09 декабря 2015 г.
Туслă та кăмăллă çемье теççĕ Патăрьелĕнчи Раковсем пирки. Кирек хăш мероприятине те хутшăнаççĕ вĕсем. Ачисем те улми йывăççинчен айккине ỹкмен иккен.
Республикăра "Çулталăк çемйи" конкурса 11 çул умлă-хыçлах ирттереççĕ. Финала ку хутĕнче 28 çемье тухрĕ. Çак йыша Патăрьелĕнчи Раковсем те кĕчĕç. Владислав Александровичпа Наталия Алексеевна мăшăрланни 18 çул çитрĕ. Вĕсем 3 ача пăхса ỹстереççĕ. Асли _ Софья _ педагогика университечĕн пĕрремĕш курс студенчĕ, Александрпа Светлана шкулта вĕренеççĕ. Наталия Алексеевна районти тĕп библиотекăра ĕçлет, машăрĕ _ пушар хуралĕн водителĕ. Иккĕшĕ те çын хушшинче хисепре, ĕçе хаклакан грамотисем те пур.
Раковсем 2010 çулта та çакнашкал конкурса хутшăннăччĕ. Район шайĕнче "Чи ĕçчен çемье" номинацие тивĕçнĕччĕ. Кăçал вара республикăра "Туслă çемье" пулнипе палăрчĕç.
Источник: "Авангард" (газета Батыревского района)