28 ноября 2015 г.
ÇАКĂН пек шухăш патне тухнă музыкçăсен районти фестивальне хутшăннă жюри членĕсемпе куракансем Сăкăтри вăтам шул сцени çине Патăрьелĕнчи пĕрремĕш вăтам шкулта вĕренекен хĕрсем тухсан. Вуннăмĕш класри виçĕ чиперкке конкурс условийĕн кашни пункчĕпе чи лайăх балл пуçтарнăранах Чăваш Республикин Культура тава тивĕçлĕ ĕçченĕ Петр Никитин ертсе пыракан юрăçсем фестивальтен çĕнтерỹ- пе таврăннă.
Хăйне евĕр тупăшăва кĕвĕ-çемĕ тĕнчине парăннă 16 учитель хутшăннă. Педагог- специалистсем чылайăшĕ пĕр е икĕ саспа юрламалли номерсене конкурс репертуарне кĕртнĕ. Патăрьелсем вара залра ларакансене чăнласах та тĕлĕнтернĕ: профессилле ăстасем пекех виççĕн виçĕ саспа юрра шăрантарнă! Çакă _ паллах, чăн малтанах хăйĕн ĕçне чун-чĕререн парăннă Петр Николаевичăн пысăк ăсталăхĕнчен, маçтăрлăхĕнчен, анлă тавракурăмĕнчен килет.
Сăмах май каласан, фестивале Петр Чайковскипе Владимир Шаинский композиторсен юбилейĕпе пĕрлех Сăкăтри вăтам шкулта музыка учителĕнче тăрăшнă Игорь Медведева асăнса йĕркеленĕ.
Источник: "Авангард" (газета Батыревского района)