14 октября 2015 г.
Çĕр çинче професси нумай. Хăвна килĕшекеннине суйласа илме çеç пĕлмелле. Çар ĕçĕпе çыхăнтаратăн-и ăна. Арçын ачасемшĕн çĕршыв хỹтĕлевçи пуласси сумлă. Çуралакан кашни ывăлнех амăшĕ салтака юрăхлă пултăр тет. Çитĕнекен каччăсен те патриотла туйăм пысăк. Çакă Патăрьелĕнчи иккĕмĕш вăтам шкултан иртнĕ çул вĕренсе тухнă А. Бородов выпускникра та уççăнах палăратчĕ. Саша халĕ çар летчикне вĕренет. Вуннăмĕш класра чухне ачасем Канашри çар комиссариатĕнче курсантсемпе тĕл пулнăччĕ. Çавăнтан хăйĕн те унта каяс шухăшĕ çуралнăччĕ. Тивĕçлĕ информаци пуçтарнă хыççăн каччă хăйне ăс-тăн, хул-çурăм тĕлĕшĕнчен те шăпах çак енĕпе хатĕрлеме пуçăнчĕ.
Жуковскийпе Гагарин ячĕсемлĕ çарпа сывлăш академийĕнчен вĕренсе тухнă пиншер выпускник офицер тивĕçне хĕç-пăшаллă вăйсен тĕрлĕ чаçĕнче пурнăçлаççĕ. Сашăн та вĕсем пек пулас килчĕ. Медицина тĕрĕслевĕ витĕр тухрĕ. Ирсерен чупассине, турник çинче туртăнассине, гантелсем çĕклессине мала хучĕ. Çар училищине çак хăнăхусемсĕр кĕрейместĕн. Патшалăхăн пĕрлĕхлĕ экзаменĕсене тивĕçлĕ пани те витĕм кỹретех. Унти тĕрĕслевсенчен ăнăçлă тухнă хыççăн каччă авиаци училищин курсанчĕ пулса тăчĕ. Савăнмалăх пур. Вĕренни служба тивĕçне пурнăçланă пекех курăнса тăрать вĕсен. Хĕллехи каникула киле килеççĕ. Çулла отпуск параççĕ.
Присяга йышăннă Саша. Пĕрремĕш курс экзаменĕсене лайăх тытнă хыççăн килĕшỹпе иккĕмĕшне куçнă. Халĕ унта малалла вĕренет. Çакăнтах Патăрьел каччи В. Раськин та пĕлỹ пухать.
Ю. БОРОДОВА.
Сăн ỹкерчĕкре: А. Бородов курсант
Источник: "Авангард" (газета Батыревского района)