16 сентября 2015 г.
225 çул каялла вырăссен паллă адмиралĕ Федор Ушаков хăйĕн çарĕпе Хура тинĕсри Тендра сăмсахĕнче Турккăсен çар-флотне çапса аркатнă. Ку çĕнтерỹ Турци çĕршывĕпе мирлĕ килĕшỹ тума тата Крыма Раççейпе пĕрлештерме май панă.
Çак мероприятие паллă тума сентябрĕн 11-мĕшĕнче Патăрьелĕнчи 1-мĕш вăтам шкула район администраци пуçлăхĕ Н. Глухов, Тинĕс-çар флочĕн ветеранĕсен Чăваш Республикинчи союзĕн председателĕ В. Крюковский, Патăрьелĕнчи "Морское братство" пĕрлешỹ председателĕ А. Казенов тата пĕрлешỹ членĕ А. Нягин, кадетсен класĕсен ертỹçисем Ю. Яковлевпа В. Паймуллин, ЧР çар комиссариачĕн Патăрьелпе Шăмăршă районĕсен пай пуçлăхĕ Е. Семенов хутшăнчĕç, кадетсене уяв ячĕпе саламланă май вĕренекенсен кулленхи пурнăçĕпе паллашрĕç. Мероприятин программи анлă пулчĕ: физкультура учителĕсем йĕркеленипе 5 а тата 10 а классем эстафета ирттерчĕç. Çамрăк армеецсен отрядĕнчи ачасем автомат салатса-пуçтарса кăтартрĕç. Вĕсен хушшинче хĕр ачасем те пурри, арçын ачасемпе пĕр танах автомата çăмăллăн "парăнтарни" пурне те питĕ тĕлĕнтерчĕ. "Хамăрăн историне, паттăрсене асра тытни пире малашлăхра пулăшса пырать, _ терĕ Владимир Крюковский уяв ячĕпе саламланă май.
_ Çак шкулта вĕренекен арçын ачасем, тен хĕрачасем те, Раççей хỹтĕлевçисем пулаççĕ. Çавăнпа вĕсене педагогсем патриотлăх туйăмĕпе воспитани пани питĕ пысăк пĕлтерĕшлĕ тесе шутлатăп". Ку сăмахсемпе пурте килĕшрĕç. Н. Андреева директор килнĕ хăнасене шкул пурнăçĕпе интересленсех тăнăшăн тав турĕ, малашне те çыхăну тытса ĕçлессине палăртрĕ.
Çакнашкал мероприятисем йĕркелени çитĕнекен ăрăва хăйсен тăван çĕршывне юратма, аслисене хисеплеме, Раççей историне тата геройĕсене асра тытма, патриотлăх туйăмне тата та вăйлăрах аталанма пулăшать.
Н. НИКИТИНА.
Пĕлсе тăма
Федор Федорович Ушаков _ вырăссен паллă флот ертỹçи. 1790-1792 çулсенче Хура тинĕс флотне, 1798-1800 çулсенчен Вăтаçĕр тинĕс флотне ертсе пынă. Адмирал çапăçусенче пĕр карап та çухатманнипе тата унăн салтакĕсем пĕри те плена лекменнипе паллă пулса юлнă. 2001 çулта вырăссен православи чиркĕвĕ ăна тỹрĕ чунлă çар çынни тесе çветтуйсен шутне кĕртнĕ.
Источник: "Авангард" (газета Батыревского района)