09 сентября 2015 г.
ПАТĂРЬЕЛĔНЧЕ пурăнакан тыл хастарĕ, салтак арăмĕ Мария Ивановна Соколова çак кунсенче кĕр мăнтăрĕпе 95 çул тултарчĕ. Ĕç ветеранне район администраци пуçлăхĕн çумĕ _ вĕрентỹ, социаллă аталану, информаци тивĕçтерĕвĕ тата архив ĕçĕн пай пуçлăхĕ Валерий Осипов, районти халăха социаллă хỹтлĕх паракан пай пуçлăхĕ Наталия Никитина, Патăрьел ял тăрăхĕн тĕп специалист-эксперчĕ Александр Сейфуллин юбилей ячĕпе саламланă.
Мария Ивановнан кун-çулĕ чылай тыл паттăрăннипе пĕрешкел: пурнăçра тĕл пулакан хурапа шурра сахал мар черетлеме тивнĕ. Апла пулин те нăйкăшман, ĕç ветеранĕ калашле, вăл вăхăтсенче вĕсенчен йывăр пурăнакан çынсем те сахал мар пулнă. Маня аппасен çемйи те пылпа çу çеç çисе ỹсмен. Чылай вăхăт ыттисемпе пĕрле коллективлă хуçалăхра ĕçлемен, инхоз ушкăнĕнчисемпе йывăрлăхĕсене сахал мар чăтма тивнĕ. Каярахпа, ỹт-пỹпе тата ăс-тăнпа ỹссе çитсен çеç вĕсем Зоя тата Александра йăмăкĕсемпе колхозра ĕçлеме пикеннĕ.
Вăрçă çулĕпе ун хыççăнхи вăхăтсем те ансат та кал-калах пыман. Маня пек çамрăксем пурте фронта пулăшма, çĕнтерĕве çывхартма кар тăнă. Хĕрупраçсем вăрман касма та, шăннă çĕре таккаса окоп чавма кайма та, сухапуçне çавăтма та ỹркенмен. Сакăлталлă пурнăçăн çак тапхăрĕсене Мария Ивановна та хăйĕн чĕри витĕр кăларнă.
Источник: "Авангард" (газета Батыревского района)