26 августа 2015 г.
Пĕр вăхăт çынсем пасарта сутакан пур япалана та, пахалăхне пăхмасăрах, туянма хатĕрччĕ. Халь вăл тапхăр иртсе кайрĕ. Паян кашнийĕ хăйне килĕшỹллĕ, сывлăхшăн сиенлĕ мар тум илме тăрăшать. Ыттисенчен уйрăларах тăрас текеннисем журналсенчен, интернетран тупнă фасонсемпе çĕлеттереççĕ.
Маттур çĕвĕçсем вара пирĕн районта çителĕклех. Хăшĕ-пĕри ятарласа пĕчĕк цех уçсах тăрăшать. Акă, А. Павловăпа Е. Сергеева та (сăн ỹкерчĕкре) килте çеç çĕвĕ машини умĕнче ларас темен _ çулталăк каялла пỹлĕм арендăна илсе хăйсен ĕçне уçнă. Çулсем иртнĕçем пухăннă опычĕ те çак утăма тума хистенĕ. Альбина Васильевна Патăрьелĕнчи професси училищинчен вĕренсе тухнă хыççăнах Шупашкарти "Работница" фирмăра хăйĕн ăсталăхне туптанă. Елена Васильевна çĕвĕç профессине алла Çĕрпỹре илнĕ. Кайран Турханти çĕвĕ цехĕнче чылай çул вăй хунă.
_ Пирĕн пата клиентсем çỹрĕç-ши? Халĕччен чылай япала çĕленĕ пулсан та эпир хатĕрленисем çынсен кăмăлне кайĕç-ши? Çак тата ытти ыйтусем малтанласа хумхантаратчĕç. Уçăлсанах хамăра пĕлекенсем, паллакансем килчĕç, каярах ыттисем те çул хыврĕç. Ĕç çуккипе пĕр кун та алă усса ларса курман. Сцена çинче юрлакансем, ташлакансем валли те тумсем çĕлерĕмĕр. Çавăн пекех тум-тире те юсаса паратпăр, _ теççĕ çĕвĕçсем.
Шăлтăр-шăлтăр! шăкăртатать çĕвĕ машини. Куç умĕнчех каснă пусма таткисенчен кĕпе тухрĕ. Пасарта сутаканнинчен нимĕнпе те кая мар. Путвалта çĕленисенчен лайăхрах та! Кун пеккине такам та тăхăнса çỹреме килĕшĕ. Алă пырсан ỹркенмесен, тăрăшсан районтах ĕç тупма пулать иккен.
О. Павлова
Источник: "Авангард" (газета Батыревского района)