05 августа 2015 г.
Чăваш Республикин Пуçлăхĕн тата вырăнти самоуправлени органĕсен суйлавĕччен шутлă кунсем çеç юлчĕç.
Сентябрĕн 13-мĕшĕнче вара хамăрăн тивĕçĕмĕре пурнăçласа алла бюллетень илĕпĕр, ырă малашлăха шанса хамăрăн сассăмăрсене палăртăпăр. Вулаканăмăра аса илтеретпĕр: иртнĕ ытларикун Чăваш Ен Пуçлăхне суйлама кандидатсем тăратмалли тата регистрацилемелли тапхăр вĕçленчĕ. Çак кун ЧР Тĕп суйлав комиссийĕн ларăвĕнче республика ертỹçин суйлавне хутшăнма пиллĕкмĕш юлашки кандидата _ Раççей пенсионерĕсен партийĕн регион уйрăмĕ сĕннĕ Валерий Сапожникова регистрациленĕ.
Суйлава хутшăнма тивĕç пулнине çирĕплетекен документа чăн малтанах Михаил Игнатьев (Пĕтĕм Раççейри "Единая Россия" партин Чăваш регион уйрăмĕ сĕннĕ), ун хыççăн Валентин Шурчанов ("Коммунистическая партия Российской Федерации" политика партийĕн Чăваш регион уйрăмĕ тăратнă), Олег Николаев ("Справедливая Россия" политика партийĕн регион уйрăмĕн кандидачĕ) тата Константин Субботин ("ЛДПР _ Либерально-демократическая партия России" политика партийĕн Чăваш регион уйрăмĕ тăратнă) илнĕ.
Суйлав стартне тухнă пилĕк кандидатран чи тивĕçлине, сăмахпа мар, чăн-чăнах ĕçпе, çитĕнỹпе хăйне кăтартнă, респуб ликăна тĕрĕс çулпа ертсе пыма пултаракан çын хушамачĕ тĕлне паллă лартăпăр. Çакă пирĕншĕн тĕп йышăну пулĕ. Суйлав хастарлăхĕ пирки те аса илтерсе хăварасшăн, мĕншĕн тесен хăшпĕр çынсем: "Пирĕнсĕрех суйлав ирттерĕç-ха",- тесе питĕ тĕрĕс мар шутлаççĕ. Пиртен кашнийĕ паян хамăрăн пурнăçа, патшалăх политикине хак пама, ырă улшăнусене курма пĕлмелле, пăтран- чăклă шухăшсен витĕмĕпе пуçсене арпаштармалла мар. Сентябрĕн 13-мĕшĕнче вара Патăрьелсем яланхиллех хăйсен хастарлăхне, тĕрĕс шухăшне тепĕр хут кăтартса парĕç тесе шутлатăп. Пур енĕпе те "пилотлă" шутланакан район суйлав итогĕпе те вĕсен шутĕнчех пулĕ.
Н. МАЗЯКОВА, хаçатăн тĕп редакторĕ
Источник: "Авангард" (газета Батыревского района)