01 апреля 2015 г.
ВАТĂСЕМ калашле, çын пуласси ачаранах паллă. Патăрьелĕнчи пĕрремĕш вăтам шкулта вĕреннĕ чухнех Гузель Айзетуллова пур енĕпе те кăтартуллă хĕрача пулнă. Ылтăн медальпе вĕренсе тухнăскер, пĕр иккĕленмесĕрех ЧПУн медицина факультетне вĕренме кайнă. Ăста тухтăр пулас ĕмĕчĕ ăна мĕн ачаранпах канăç паман. Çирĕп кăмăллă чиперкке хăйĕн тĕллевне пурнăçланă пурнăçланах, аслă шкултан та хĕрлĕ дипломпа вĕренсе тухнă.
Малалла çамрăк хирург хăйĕн специальноçĕпе ĕçленипе çеç çырлахман, ăсталăхне, пултарулăхне ỹстерес тĕллевпе наука каçалăкĕнче те хăйĕн вырăнне тупнă. 2013_2015 çулсенче Саранскри аспирантурăра пĕлĕвне малалла тăснă. Çамрăк амăшĕн тăрăшни, йывăр ĕçре ăсталăхне туптани харама кайман. Çак кунсенче вăтăр çеç тултарма ĕлкĕрнĕ Гузель Рафаиловна медицина наукисен кандидачĕ пулма ăнăçлă хỹтĕленнĕ. Ашшĕпе амăшĕн хăйĕн хĕрĕпе савăнмалăх та, мухтанмалăх та пур. Вĕсемпе пĕрлех шкул коллективĕ те унпа тивĕçлипе мăнаçланма пултарать.
Альбина ЕГОРОВА
Источник: "Авангард" (газета Батыревского района)