28 февраля 2015 г.
Патăрьелĕнчи "Василек" ача садĕнчи аслă ушкăнри ачасемпе воспитательсем "Зарничка" çарпа спорт вăййине ирттерчĕç. Ку вăййа Çĕр-шыв хỹтĕлевçисен уявне халалланă. Тĕллевĕ: çитĕнекен ăрăва аслисене хисеплеме вĕрентесси, вĕсен чĕрисенче патриотла туйăм çуратасси.
Тĕл пулăва Афганистан тата Чечен вăрçинче пулнă Ю. Майрушкина, Чечен вăрçин участникне В. Каштанова чĕнчĕç. Ачасем вĕсене сăвăсем вуласа, юрăсем юрласа пачĕç. Хаклă хăнасем вара çар служби çинчен каласа кăтартрĕç. Шăпăрлансем ĕнерхи салтаксене питĕ тимлĕн итлесе ларчĕç, хăйсене интереслентерекен ыйтусене те хускатрĕç.
Кĕçĕннисем хăнасен умĕнче парăмра юлмарĕç, хăйсен аллипе ăсталанă парнесемпе савăнтарчĕç, малашне те хăйсен патне килсе çỹреме ыйтрĕç. Садик заведующийĕ Ю. Козлова ачасем патне килме вăхăт тупнăшăн хăнасене тав турĕ, Çĕр-шыв хỹтĕлевçисен кунĕ ячĕпе саламларĕ.
Р. ХАМБИКОВА, воспитатель
Источник: "Авангард" (газета Батыревского района)