25 февраля 2015 г.
Патăрьелĕнчи пĕрремĕш тата иккĕмĕш вăтам шкулта вĕренекенсем "Адмирал Кузнецов" крейсер çинчи Раççей флочĕн флагманĕн делегацийĕпе тĕл пулу ирттерчĕç. Виççĕмĕш рангри капитан И. Орешников пĕлтернĕ тăрăх, унта 100 ытла чăваш службăра тăрать-мĕн. Ытларахăшĕ _ контрактпа.
Делегаци маларах Чăваш Ен Пуçлăхĕпе М. Игнатьевпа та тĕл пулнăччĕ. Михаил Васильевич пирĕн ентешсем унта çар тивĕçне пурнăçланишĕн хĕпĕртенине пĕлтернĕччĕ. Тинĕс-çар флочĕн республикăри ветерансен пĕрлĕхĕн ертỹçи В. Крюковский Конституци тивĕçне пурнăçлама хăнăхтарас ĕçе кадет класĕсенчен пуçăнмаллине палăртнăччĕ. Паян тинĕс-çар флотĕнче службăра тăрасси чыслă. Килĕшỹпе каякансене тỹлевĕ те хавхалантарать. Рядовой матроссем уйăхсерен 50 пин тенкĕрен кая илмеççĕ. Кану вăхăтĕнчи çул çỹрев тỹлевсĕр. "Çар ипотекин" пулăшăвĕпе пурăнмалли хваттерпе тивĕçтереççĕ. Шăпах çак ыйтусем тавра пычĕ калаçу çитĕнекен ăрупа.
А. КАЗЕНОВ, "Морское братство _ Союз моряков" ветеранĕсен районти канашĕн председателĕ
Источник: "Авангард" (газета Батыревского района)