19 июля 2014 г.
Питравччен ĕлĕк çырла çимен. Халь, паллах, ăна пăхсах каймастпăр. Хĕп-хĕрлĕ çĕр çырлине, хăмла çырлине курсан çăвара хыпмасăр ăçтан чăтан! Пахчана е сада кĕрсен вĕсем хăйсем патне аякранах кăчăк туртса чĕннĕн, татма ыйтнăн туйăнать. Çырласем пĕрин хыççăн тепри пиçеççĕ, тăраниччен çи те çи! Хурлăхан та халь хуп-хура, симĕс çулçăсем айне хĕвелтен пытаннă пулин те тỹрех куçа курăнать. Патăрьелĕнчи улма-çырла питомникĕнче ăна пуçтарма пикеннĕ. Пĕр 10 çул каялла кăна-ха çи-мĕçе çынсем алăпа тататчĕç. Халь вара ятарлă комбайн ĕçлет. Вăл тĕмрен пĕр çырла хăвармасăр тенĕ пек пухса илет. Хăватлă техникăна В. Тимофеев тытса пырать. А. Чернова тата М. Гузева конвеерпа хăпаракан çырласем ещĕксене тулнине пăхса тăраççĕ. Д. Гриднев вара сутлăха хатĕр продукцие "карап" çинчен пушатать.
_ Çимĕç паракан хурлăхан тĕмĕсем 10 гектар йышăнаççĕ. Тухăç кăçал пĕлтĕрхинех çитмест, анчах начар тесе те калас килмест. Çырлана хамăр районта пурăнакансем, çавăн пекех Чĕмпĕртен, Хусантан килсе илеççĕ, _ пĕлтерет А. Седойкин агроном.
Питомник кăшт маларах çĕр çырли те сутрĕ. Çă-вара хыпсанах ирĕлекен çимĕç 3 гектарта çитĕннĕ. Ăна та ют тăрăхран нумайăн килсе туяннă.
Хуçалăх çамрăк хунавсем çитĕнтерессипе те аван ĕçлет. Тĕмсене вăй илсе кайма çулленех тумламлă меслетпе шăвараççĕ. Кăçал та çаплах турĕç: 17 гектарта вăхăтран-вăхăта "çумăр" çурĕ. Агрономра 30 çул ытла тăрăшакан В. Ильин тĕмсем мĕнле ỹснине сăнасах тăрать. Çитес кĕркуннепе çуркунне пан улми, чие тата ыттине туянас кăмăллисем валли йывăçсем хĕвел çутинче ярăнса кăна ỹсеççĕ.
Çырлана çиме кăна лайăх çав. Продукци илес тесен нумай тар тăкмалла. Çитес çул тухăç лайăх пултăр тата çум курăк ан ашкăртăр тесе çĕр çырли йăранĕсем хушшине кăпкалатма пикеннĕ. Çавăн пекех пан улми йывăççисем патĕнче те ĕç вĕрет: Р. Абидуллов механизатор (сăн ỹкерчĕкре) тăпрана сỹрелет.
О. ПАВЛОВА
Источник: "Авангард" (газета Батыревского района)