30 апреля 2014 г.
Патăрьелĕнчи "Батыревский" ял хуçалăх пĕрлешĕвĕ пĕрчĕллĕ тата пăрçа йышши культурăсене акса пĕтернĕ: 467 гектар урпа тата 462 гектар тулă никĕсе хывнă. Апла пулин те техника хиртен таврăнман-ха. Хуçалăх çĕр улми туса илессипе ăнăçлă ĕçлет. Кăçал ăна 255 гектар çитĕнтерме планланă. Анчах вăрлăх ытларах хатĕрленине шута илсе лаптăка тата та пысăклатма палăртаççĕ. Сăмах май, кунта халех колорадо нăрринчен хỹтĕлекен тата лайăх ỹсме пулăшакан препаратсем хутăштараççĕ.
Тракторсем инçерех кайнăран пысăк пăнчă пек çеç курăнаççĕ пулин те çурхи варкăш çил вĕсен сассине иле-иле килет. Доминаторпа çемçетнĕ кăпăшка ана тăрăх çĕр улми лартакан агрегата кăкарнă хурçă "утсем" пĕр пек хăвăртлăхпа васкамасăр пыраççĕ. Ю. Арлановпа А. Пыркин механизаторсем хăйсене шаннă тивĕçе чунтан пурнăçлани тата руль умĕнче пĕрремĕш çул кăна марри тỹрех сисĕнет: йăрансем тỹрĕ, хитре... Вĕсем куллен 12-14 гектар лартаççĕ. Ĕнерхи кун тĕлне 80 гектарта ĕçе вĕçленĕ. Çул хĕрринчех тиевлĕ автомашина ларать. Яровизацине кăларнă вăрлăха хире С. Сулагаевпа В. Ялуков вăхăтра турттарса тăраççĕ.
Хуçалăхра вăрлăхсене çĕнетнисĕр пуçне техника паркĕнче те улшăнусем чылай. "Иккĕмĕш çăкăр" уйĕнче халĕччен 3 техника ĕçленĕ. Ф. Тарасов инженер пĕлтернĕ тăрăх, малашне вара 4 пулĕ. Нумай пулмасть çеç туяннă МТЗ-1221 маркăллă трактор та унтах "тар тăкĕ". Çавăн пекех икĕ доминатор тата йăран хăпартакан пĕр агрегат хутшăннă.
Çĕр улми хранилищинче те шав тăрать. Вăрлăх тиессине пĕтĕмпех механизациленĕ. Транспортер умĕнче тăракан хĕрарăмсем шултăрараххисене çеç касаççĕ тата юрăхсăррисене иле-иле пăрахаççĕ.
О. ПАВЛОВА
Источник: "Авангард" (газета Батыревского района)