25 декабря 2013 г.
УЛМИ йывăççинчен аякка ỹкмест, теççĕ. Ку чăнах та çаплах ĕнтĕ. Пурнăçра та ашшĕ-амăшĕ çуратса ỹстернĕ пепкесем ниепле те кỹршĕ евĕр пулаймĕç. Патăрьелĕнче пурăнакан Кудрявцевсем хăйсем çеç мар, чун панă ачисене те мĕн пĕчĕкрен ĕçе хăнăхтарса çитĕнтернĕ. Çакăншăн вара паян вĕсем ỹкĕнсе чавсине çыртмаççĕ, савăнса çеç пурăнаççĕ. Акă, районти тĕп библиотекăра пĕр уйăх амăшĕпе хĕрĕн ылтăн аллине кăтартакан курав ĕçлерĕ. Светлана Николаевна асамат кĕперĕн тĕсĕсене усă курса 36 ỹкерчĕке пир татки çине çипсемпе тĕрленĕ! Вĕсем хушшинче хĕм сапакан хĕрлĕ мăкăнĕ те, юмахри ырă сăнарсем тата ыттисем те пур. Портретсем вара пăхса ытармалла мар!
Унăн хĕрĕ, Оксана Витальевна (Сергеева), "Россельхозбанкри" яваплă ĕçре тăрăшать пулин те, чун киленĕçне амăшĕ пекех тĕрĕсенче тупать. Çамрăк хĕрарăм курава тăратнă 12 ĕçне те куракансем питĕ пахаланă.
Источник: "Авангард" (газета Батыревского района)