11 декабря 2013 г.
Патăрьелĕнчи иккĕмĕш вăтам шкулта ачасен сывлăхне çирĕплетес тĕллевпе "Здоровейка", "Çамрăк волейболист", "Шашка-шахмат", "Паттăр" çарпа патриотла клуб тата ытти кружоксемпе секцисем ĕçлеççĕ.
"Çамрăксем _ сывă пурнăç йĕркишĕн" акцие хутшăнса спорт ăмăртăвĕсем, КВН, викторинăсем, презентацисем йĕркелерĕмĕр. Йăлана кĕнĕ пионербол вăййи ачасен асĕнче юлчĕ. Кунта çитĕнекен ăрăвăн икĕ мечĕкпе вылянипе асăрханулăха ỹстересси, тавра курăма аталантарасси малта тăчĕ. Чи пултарулли вара 7а класс пулчĕ. Çĕнтерỹçĕсем кубок илчĕç. Иккĕмĕшпе виççĕмĕш вырăнсене 6-апа 7б классем пайларĕç.
Аслисем хушшинче пилĕк енлĕ эстафета йĕркелерĕмĕр. Кунта ачасем кам маларах вĕренỹ пăшалне сỹтсе пуçтарассипе, пушарниксен тумне тăхăнассипе, патронсене тирпейлессипе, ОЗК тăхăнассипе, турник çинче ытларах йăтăнассипе ăмăртрĕç. 10г класри С. Быков дистанцие тĕрĕс тухса пĕрремĕш вырăн çĕнсе илме пултарчĕ. 2-3-мĕш вырăнсене 9а класри А. Красновпа 10г класри Н. Михайлов пайларĕç.
Мала тухнă командăсене, çĕнтерỹçĕсене хисеп хучĕсем парса хавхалантарчĕç.
Ачасен хаваслă сасси шкул спортзалĕнче малашне те янăрасах тăрĕ.
В. АНТИПОВ
Источник: "Авангард" (газета Батыревского района)