20 июля 2013 г.
Чăваш патшалăх университечĕн Патăрьелĕнчи филиалĕн "лаççинчен" çак кунсенче 218ăн алла аслă пĕлỹ илнине çирĕплетекен документа илчĕ. 67-шĕ- экономистсем: 20-шĕ куçăмлă, теприсем куçăмсăр майпа вĕреннĕ, виççĕмĕшĕсем- иккĕмĕш аслă пĕлỹллĕ. Чылайăшĕн ĕçĕ пур. Тăван килте пурăнсах аслă пĕлỹллĕ пулма май пурришĕн савăнмаллах. Çакна выпускниксене чыслă лару-тăрура диплом панă вăхăтра та чылайăшĕ палăртрĕ. Малтан вĕрентỹ учрежденийĕн ертỹçи Л. Лялина мал ĕмĕтлĕ çамрăксене сумлă диплома илнĕ ятпа ăшшăн саламларĕ, Патшалăх заказне пурнăçласа специалистсем хатĕрлес ĕçе мĕнле туса пыни çинче чарăнса тăчĕ.
Савăнăçлă мероприятие районти предприятисемпе учрежденисен ертỹçисем, преподавательсем, ашшĕ-амăшĕ те хутшăнчĕ. Çакă ун сумне тата та ỹстерет Акă, Патăрьел ял тăрăхĕн пуçлăхĕ А. Моисеев çамрăксене халиччен мĕн вĕреннипе лăпланса лармалла маррине палăртрĕ. Выпускниксенчен хăшĕ-пĕри диплома Патăрьелĕнчи перекет банкĕн ертỹçинчен А. Григорьевран илчĕ. Асăннă учрежденинче филиал выпускникĕсем сахал мар вăй хураççĕ. Çавна май ун сăмахне те итлеме кăмăллă пулчĕ:
-_ Перекет банкĕ - малашлăхлă. Специалистсем кирек ăçта та кирлĕ. Хăшĕсем хăйсен бизнесне аталантарса малалла çулĕсене уçаççĕ. Ăнăçу вĕсене,- терĕ Алексей Леонидович.
"Канашмежрайгаз" пĕрлешĕвĕн районти филиалĕн ертỹçин М. Шамбазовăн та савăнма сăлтавĕ пур. Филиалта унăн иккĕмĕш ывăлĕ Наил аслă пĕлỹ илнĕ. Уява хутшăннă ашшĕпе амăшĕ çитĕнекен ăрура малашлăха курма ĕмĕтленет, ачи савăнтарасса шанать.
Выпускниксене Сăкăт ял тăрăхĕн пуçлăхĕ С. Толстов, Н. Лукьянов художник тата ыттисем те саламларĕç. Ĕнерхи студентсем те парăмра юлмарĕç, вĕрентекенсене тав туса юрăсем юрларĕç.
А. АСТРАХАНЦЕВА
Источник: "Авангард" (газета Батыревского района)