15 июня 2013 г.
Хĕл хырăмĕ аслă. Акционерсен "Батыревский" хупă пĕрлешỹре çакна яланах асра тытаççĕ. Кунта паян та ĕнесене иртнĕ çулхи сенажпа тăрантараççĕ, айĕсене сарма та улăм çителĕклĕ. Кăçала валли те ешĕл апата янтăлама пуçланă. Нумай çул ỹсекен курăк анинче кайăк хурсем пек харăсах 3 трактор ĕçлет. Вĕсем "Волга-2" тата КПИ-2,4 агрегатсемпе вырнă курăка вĕтетеççĕ. Сенажа П. Гаврилов тата А. Осипов Т-150 тата К-700 хурçă "утсемпе" таптаççĕ. Выльăх апачĕ хатĕрленĕ çĕрте пурĕ 4 машина, 13 трактор, 23 çын тăрăшать.
- Кăçал та сенаж пĕлтĕрхинчен кая мар - 4000 тонна - янтăлама палăртнă. Хальлĕхе 1000 тонна ытла хунă. Çурма выçă тăракан ĕне продукци памасть, - тет хуçалăх ертỹçин çумĕ В. Мальцев. Сăмах май, "Батыревский" пĕрлешỹре выльăх шучĕ пĕчĕк мар. Кунта ĕне-выльăх 646 пуç, вĕсенчен сăвăнаканни - 250. Куллен вăтамран 6,5 тонна сĕт сăваççĕ.
О. ПАВЛОВА
Источник: "Авангард" (газета Батыревского района)