03 октября 2012 г.
Ача пурнăçĕнче шкул çулне çитичченхи вăхăт яваплă тапхăр шутланать. Шăпах çавăн чухне унра çын пуласси палăрать, сывлăхĕ тĕрекленет. Малашнехи ăнăçлăх вара воспитательсенчен нумай килет. Çитĕнекен ăрăва шкул сакки çине лариччен кирлĕ пĕлĕве парас тесен, паянхи педагогăн хăйĕн те нумай пĕлмелле. Урăхла каласан, ача садĕнче пĕлÿ никĕсне кирлĕ пек хума тăрăшмалла.
Патăрьелĕнчи культурăпа кану центрĕнче шкул çулне çитмен учрежденисенче ĕçлекенсен професси уявне паллă турĕç. Çак ятпа воспитательсене, çак сферăра вăй хуракансене, ветерансене райадминистрацин вĕрентÿ пайĕн начальникĕ В. Осипов саламларĕ.
Шкул çулне çитмен ачасемпе 300 çын ĕçлет. Вĕсенчен 150-шĕ–педагог. Ача сачĕсенче 1828-ăн малтанхи пĕлÿллĕ пулаççĕ. Сентябрь пуçламăшĕнче пĕчĕккисем валли Патăрьелĕнче тепĕр хăтлă кермен “Сказка” хута кайрĕ. Унта педагог кадрĕсемпе ытти персонал çителĕклĕ. Ача садĕнче ку чухнехи вĕрентÿ, методика, вылямалли оборудовани те пур, 8 сăнав камери вырнаçтарнă. Кунта 276 ача çÿреме пуçлать. Октябрĕн 20-мĕшĕнче çакнашкал телей Шăнкăртамсене çитĕ. 160 вырăнлăх ача сачĕ хута каймалла.
Професси ăстисене уяв ячĕпе вĕрентÿ пайĕн начальникĕн çумĕ Н. Федорова, методика центрĕн директорĕ Ю. Миронова, вĕрентÿ ĕçченĕсен профсоюз райкомĕн председателĕ А. Пирогов, районти депутатсен Пухăвĕн депутачĕ Н. Еремеев, Патăрьел ял тăрăхĕн пуçлăхĕ А. Моисеев, Туçари ача сачĕн воспитательници М. Щербакова саламларĕç. Культурăпа кану центрĕн юрă, “Евгения” ташă ушкăнĕн ăстисем паха ташă-юрăпа савăнтарчĕç.
Источник: "Авангард" (газета Батыревского района)