Публикации » Çирĕп утăмпа малалла

Патăрьелĕнчи иккĕмĕш вăтам шкулта вĕренекенсем шкул тулашĕнче ирттерекен олимпиадăсене, наукăпа практика конференцийĕсене, республика шайĕнчи предмет фестивалĕсене сахал мар хутшăнаççĕ, малти вырăнсене çĕнсе илеççĕ. Çакăнта, паллах, учительсен тÿпи пысăк. Вăл шутра Н. Чумеринăн та. Николай Иванович 1979 çулта Чăваш патшалăх педагогика институчĕн физикăпа математика факультетĕнчен вĕренсе тухса алла диплом илнĕ.

Тăрăнти шкулта малтанхи утăмсене тунă. Çулталăкран педагог тăван яла – Çĕнĕ Ахпÿрте – таврăннă. Ун çине физика, черчени, ĕç урокĕсем тиеннĕ. Çамрăк специалиста тÿрех асăрханă. Çакна 1983-1990 çулсенче шкул директорĕн вĕрентÿ енĕпе ĕçлекен çумĕ пулма уйăрни те аван çирĕплетет. Коллектив вара ăна каярах ертÿçĕ тилхепине тытма ыйтать. Сакăр çул туртать Николай Иванович йывăр лава. 2006 çултанпа педагог Патăрьелĕнчи иккĕмĕш вăтам шкулта вăй хурать. Çак хушăра вăл наукăпа творчество ĕçĕнче 10 çĕнтерÿçĕ хатĕрлерĕ. 2009 çулта Саша Табаков республикăри конкурсра пĕрремĕш вырăн йышăнчĕ. 13 ача районта физикăпа астрономи предмечĕсемпе иртнĕ олимпиадăсенче пултаруллисем пулса тăчĕç. Саша Табаковпа Даша Новикова Мускаври аслă шкулсенче ăс пухаççĕ. Вĕренсе тухакансем Патшалăхăн Пĕрлĕхлĕ экзаменĕсене физикăпа, математикăпа йĕркеллĕ тытни те педагогсемшĕн кăмăллă.

Николай Иванович хăй те шкул тулашĕнчи мероприятисене, районти, республикăри фестивальсене хастар хутшăнать. Пĕрре мар ун патĕнче уçă уроксем, семинарсем ирттернĕ. 2008 çулта вĕрентÿ институчĕпе йĕркеленĕ семинарне тивĕçлĕ хака хучĕç. 2006 тата 2009 çулсенче Н. Чумерин Вăрнар поселокĕпе Çĕрпÿ хулинчи фестивальсене хутшăнса çĕнтерÿçĕ ята тивĕçрĕ.

Педагог “Вĕрентÿ отличникĕ” ята вара 1990 çулта илнĕ. Унăн портфолиовĕнче грамотăсем, дипломсем нумай. Николай Ивановичăн вĕрентÿ ĕçченĕсен профсоюзĕ 100 çул тултарнă май илнĕ юбилей медалĕ те пур. Çаксем пурте учитель ача-семпе чунне парса ĕçленине çирĕплетеççĕ.