Публикации » Лайăх вĕренет, спортра çĕнтерет

Патăрьелĕнчи иккĕмĕш вăтам шкулта ачасен тавра курăмне, ăс-тăнне аталантарассишĕн ырми-канми тăрăшаççĕ. Çакна районта, республикăра иртекен олимпиадăсенчен, наука конференцийĕсенчен вĕренекенсем çĕнтерÿпе таврăнни çирĕплетет.

Чи-чи маттуррисем Чăваш Республикин Пуçлăхĕ тата Патăрьел район администрацийĕн пуçлăхĕ паракан стипендине илеççĕ. Кăçалхи вĕренÿ çулĕнче 11 е класри Эльвира Самакинăпа Эдуард Тихонов çакăн пек чыса тивĕçрĕç. Иккĕшĕ те пултаруллă, маттур, “5” паллăсемпе çеç вĕренсе пыраççĕ.

Эдик Патăрьелĕнчи иккĕмĕш вăтам шкулта пĕрремĕш класранпах ăс пухать. Çамрăк каччă районта, республикăра иртекен олимпиадăсене хастар хутшăнать. Сăмахран, 2008–2009 вĕренÿ çулĕсенче ОБЖ, право, обществознани, истори, географи предмечĕсемпе малти вырăнсене тухрĕ. Пĕлтĕр 8 предметпа çĕнтерÿçĕ ятне тивĕçрĕ. Çав çулах республикăра та географине лайăх пĕлнипе палăрчĕ, виççĕмĕш вырăна тухрĕ (ертÿçи В.Карягин). Кăçал та хăй анлă тавра курăмлă, тавçăруллă пулнине тепĕр хут çирĕплетрĕ. Вăл çÿлерех асăннă предметсене лайăх пĕлнине кăтартса пачĕ, I-III вырăнсене йышăнчĕ.

Яш спорт, обществăлла мероприятисене хастар хутшăнать. Ăна районта иртекен çарпа патриотла “Зарница”, “Орленок” вăййисенче курма пулать. Республика шайĕнче те çамрăк командир Юхмапа Пăла тăрăхĕн чысне пĕрре мар хÿтĕленĕ. 2010–2011 вĕренÿ çулĕсенче пушара хирĕç кĕрешессипе ирттернĕ ăмăртура вăл ертсе пыракан команда иккĕмĕш вырăна çĕнсе илчĕ.

Э.Тихоновăн сăн ÿкерчĕкĕ “Лучшие спортсмены”, “Галерея славы” стендсенче пур.