28 сентября 2011 г.
Президент стипендине илсе тăма тивĕçлĕ республикăри пултаруллă та ăслă-тăнлă ача хушшинче Патăрьелĕнчи пĕрремĕш вăтам шкулти Ирина Федорова та пур. Вăл кашни предметпах ăнăçлă ĕлкĕрсе пырать. Районти олимпиадăсен çĕнтерÿçи шутланать. 2005 çулта Ирина ют чĕлхепе виççĕмĕш, кăçал химипе иккĕмĕш, биологипе, вырăс чĕлхипе, литературипе, физкультурăпа иккĕмĕш вырăнсене йышăннă. Иртнĕ çул çамрăксен биологи чемпионатĕнче иккĕмĕш степенлĕ диплома тивĕçнĕ. 2009 çулта федераллă казначействăна 15 çул çитнĕ май Ирина 11 çултан пуçласа 14 çулсенчи ачасем хушшинче ÿкерчĕксем туса республика конкурсĕнче пĕрремĕш вырăн çĕнсе илнĕ. Кăçал фитнес-аэробика чемпионатĕнче виççĕмĕш вырăна тухнă. Çулленех “Кенгуру”, “Русский медвежонок”, “Британский бульдог”, “Золотое руно”, “Инфознайка” конкурссене хутшăнса малти вырăнсене тивĕçет.
Мал ĕмĕтлĕ Ирина. Лартнă тĕллевне пурнăçлама пултарать. Хăйне килĕшекен предметсемпе уйрăммăн ĕçлет. Волейболла, баскетболла выляма юратать. Ку енĕпе шкул чысне хÿтĕлеме хутшăнать. Пĕр ăмăрту та унсăр иртмест.
Шкулти аслă классенче вĕренекенсен канашĕн членĕ И. Федорова. Юлташĕсем, пĕрле вĕренекенсем хисеплеççĕ ăна.Источник: "Авангард" (газета Батыревского района)