Публикации » Вĕренме чĕнет училище

Илемлĕ вырăнта вырнаçнă Патăрьелĕнчи 7-мĕш професси училищи. Район центрĕпе пыракан асфальтлă çул вĕренÿ çурчĕ патнех çитет. Йĕри-тавра симĕс курăк, йывăç-тĕм, чечексем ырă шăршă кăлараççĕ. Тирпейлĕх те лăпкăлăх хуçаланать кунта. Хăватлă техника шавĕ кансĕрлемест. Çăтмахăн пĕр кĕтесĕ тесен те йăнăшмастăп. Професси училищинче 300е яхăн ача вĕренет. Вĕсене пурнăç çулĕ çине кăларма мĕн кирли пурте пур. Кадрсем çителĕклĕ. База пуян. Тĕплĕнрех вĕренÿ условийĕсемпе унăн директорне Вячеслав Николаева паллаштарма ыйтрăмăр. Вячеслав Веняминовича малтанах çĕнĕ вĕренÿ çулĕнче хăш специальноçпа пĕлÿ пухма май пурри çинче чарăнса тăма сĕнтĕмĕр.

–Тăхăр класс пĕтернĕ ачасене вăтам пĕлÿ панипе пĕрлех ял хуçалăх производствин тракторист-машинисчĕ (В,С категориллĕ водитель удостоверениллĕ те пулаççĕ) пулма хатĕрлетпĕр. Икĕ çул та 5 уйăх вĕренмелле. Повар, кондитер профессийĕсем те пурнăçра кирлĕскерсем. Вĕренÿ вăхăчĕ çавăн чухлех.

Алăра аттестат пуррисене 10 уйăха вĕренме килме йыхравлатпăр. Автомеханик, çĕвĕç, сварщик пулас ĕмĕтлисене чĕнетпĕр. Çавăн пекех кăçалтан Патшалăхăн пĕрлĕхлĕ экзаменĕсене тытайман ачасене вĕренме илетпĕр. Заявленисене сентябрĕн 1-мĕшĕччен йышăнатпăр. Унпа пĕрле вĕреннине çирĕплетекен документ, медицина справки, паспорт копийĕ, 3Х4 сантиметрлă 6 сăн ÿкерчĕк кирлĕ.

–Училище республикăри кăнтăр районĕсемшĕн ĕçлет тени те тĕрĕсех пулас. Кÿршĕллĕ Елчĕк, Шăмăршă, Комсомольскинчен йышлăн килеççĕ унта. Унăн ырă ячĕ Ульяновск облаçĕпе Шупашкар таранах çитрĕ. Аякрисене пурăнма ăçта вырнаçтаратăр;

–Çакна та палăртма манар мар. Вĕренÿ–тÿлевсĕр. Унсăр пуçне хăтлă общежитине вырнаçтаратпăр. Пурăннăшăн тÿлемелле мар. Шыв кĕртнĕ. Канализаци ĕçлет. Çул çÿреме билет (проездной) илсе паратпăр. Кунне виçĕ хутчен (каллех тÿлевсĕр) апатлантаратпăр.

–Квалификациллĕ кадрсем хатĕрлес ĕçре пуян вĕрентÿ хуçалăхĕ кирлĕ...

–База тĕреклĕ. Вĕрентÿ кабинечĕсене кирлĕ оборудованисемпе тивĕçтернĕ. Çĕнĕ йышши компьютерсем çителĕклĕ. Мультимедиапроекторсем пур. Методика кабинечĕсем илĕртÿллĕ. Электронлă вĕрентÿ кĕнекисемпе усă куратпăр. Пуян библиотека пур. Спортзал лайăх. Вĕрентÿ хуçалăхĕнчи çĕр çинче ĕçлĕ практика илеççĕ. Мастерскойсем хăтлă. Техника çителĕклĕ. Нумай çул юрăхсăр ларнă КамАЗа чун кĕртнĕ. Иртнĕ çул çĕнĕ ВАЗ-21014, кăçал икĕ ВАЗ-2106 автомашина илнĕ.

–Вĕренме нихăçан та кая юлмастăн. Пурнăç улшăнса пынă май квалификацие улăштарас текенсем аслисем хушшинче те тупăнаççех.

–Çакна шута илсе ЭВМ операторне, повара, ВС категориллĕ водителе, ВСДЕF категориллĕ тракториста, кассира, çĕвĕçе, каменщика, электросварщика вĕренес текенсен курсĕсене йĕркелетпĕр. Ĕç вырăнĕсем тупăнсах пыраççĕ вĕсемшĕн. Районти кашни виççĕмĕш таксист пирĕн выпускник тесен те йăнăшмастăп пулĕ. Е сутуçăсемпе кассирсенех илер. Саманине кура ĕç вырăнĕсене улăштарнăскерсем вĕсем. Теори пĕлĕвне пирĕн патăрта илнĕскерсем.

–Канăва хаваслă йĕркелеме пулать-и;

–Училищĕре вĕренекенсем район, республика шайĕнчи конкурссене хутшăнаççĕ. Техникумсен, колледжсен, училищĕсен общежитийĕсен хушшинче ирттернĕ конкурсра çĕнтерсе телевизор, музыка центрĕ илме тивĕçлĕ пулчĕç. Хор кружокĕ “Çамрăк талантсем-2010” конкурсра призлă вырăн йышăннă.

Спорт хисепре училищĕре. Вĕренекенсем те, вĕрентекенсем те футбол, волейбол вăййисене хутшăнса пĕрре мар çĕнтерÿçĕ ятне тивĕçнĕ.

–Кадрсем çинчен сăмах пулмарĕ...

–Тава тивĕçлĕ ĕçченсем сахал мар. Раççей Федерацийĕнчи профессиллĕ вĕрентĕвĕн хисеплĕ ĕçченĕсем–С.Алексеев ПДД преподавателĕ, В.Селиванов, Н.Чинкин, Н.Урмакова, И.Рубцова аслă категориллĕ, Чăваш Республикин тава тивĕçлĕ вĕрентекенĕ В.Волков, Г.Селенина, Р.Ахметов, А.Куданова, В.Спинов, А.Адикин нумай çул ĕçлекен преподавательсем, мастерсем тата ыттисем те вĕренекенсене тивĕçлĕ пĕлÿ парса ĕçе юрăхлă хатĕрлессишĕн тăрăшаççĕ.

Паян аслă пĕлÿ илнĕ юрист, экономист нумай. Вĕсем ĕçе вырнаçайманшăн пăшăрханаççĕ. Ял хуçалăхне вара шăпах пирĕн патăрта вĕреннĕ специалистсем кирлĕ. Килĕр, кĕтетпĕр. Пĕлÿ илме аякка каймалла мар. Условисем тивĕçтереççĕ. Уйăхсерен стипенди паратпăр. Аçăр-аннĕршĕн те тăкакĕ сахалрах пулĕ. Малалла вĕренсе аслă пĕлÿ илес текенсемшĕн те майсем çителĕклех. Пирĕн выпускниксемех Чăваш патшалăх университечĕн Патăрьелĕнчи филиалĕнче чылайăн вĕренеççĕ.