20 февраля 2016 г.
РАЙОНТА ыттисемпе юнашарах лаша спорчĕ аталанса, вăй илсе пыни питĕ кăмăллă. Ахальтен мар ĕнтĕ Юхмапа Пăла тăрăхĕнче çулсеренех иртекен акатуй-сабантуйĕнчи чи çивĕч те кăсăклă пулăм _ урхамахсемпе çаврăм хыççăн çаврăм чупни. Çак тупăшура иртнĕ çулхи ĕçпе юрă уявĕнче мала тухнă Пăлапуç Пашьелĕнчи Сергей Кузьмичев тытса пыракан Комбинатор паянхи кун та çитĕнỹ хыççăн çитĕнỹ тăвать. Çак кунсенче çеç спортсмен Чĕмпĕрте иртнĕ пысăк ăмăртуран та çĕнтерỹпе таврăннă. Сергей Николаевич хăйĕн чĕлхесĕр янаварĕпе ипподромри 1600 метрлă дистанцие 2 минут та 10,8 çеккунтра чупса тухса финиша пĕрремĕш çитнĕ. Хуçа хĕл кунне пăхмасăр тренировкăсенче çухрăм хыççăн çухрăм хыçа хăварни харама кайман. Хăй ăсталнă 2500 метрлă çавра çул çине кашни кунах тухнин усси пурах. Ç
ак ăмăртуранах Кивĕ Ахпỹртри Неформальный (тилхепине тытса пыраканĕ Анатолий Каргин) виççĕмĕш вырăнпа таврăннă.
Источник: "Авангард" (газета Батыревского района)