12 декабря 2015 г.
Пăлапуç Пашьел шкулĕн ĕçченĕсем Шупашкарта "Çамрăксен хаçачĕ" 90 çул тултарнине халалласа ирттернĕ уява çитсе килчĕç. Вăл Пукане театрĕнче иртрĕ. Пухăннисене ЧР информаци политикин министрĕ Александр Иванов ячĕпе министерствăн информаципе аналитика пайĕн пуçлăхĕ Евгения Кудряшова саламларĕ. Çавăн пекех "Хыпар" Издательство çурчĕн ертỹçин тивĕçĕсене пурнăçлакан Михаил Арланов, "Çамрăксен хаçачĕн" пĕрремĕш редакторĕ Геннадий Максимов, пирĕн ентеш Альбина Юрату поэтесса хаçат тусĕсемпе вулаканĕсене ăнăçусем сунчĕç. Хальхи хаçат редакторĕ Дмитрий Моисеев тата ытти калем ăстисем сумлă наградăсене тивĕçрĕç. Саламлакансем татах та нумай пулчĕç. Сумлă хăнасен йышĕнче Пушкăрт çыравçи Айгиз Баймхуаметов пурри пурне те савăнтарчĕ. Унăн чăвашла куçарнă "Ан хăвар, анне" повеçне "Çамрăксен хаçатĕнче" номертен номере пичетлесе пыраççĕ.
Концерт хыççăн лотерея выляттарчĕç. Пирĕн шкулти вырăс чĕлхипе литератури учителĕ Вероника Бахитова тĕп приза - мультиваркăна выляса илни те пире савăнтарчĕ.
С. НИКИТИНА
Источник: "Авангард" (газета Батыревского района)