10 сентября 2019 г.
Лидия Ковалюк пирĕн районти Алманчă ялĕнче çуралса ỹснĕ. И. Н. Ульянов ячĕллĕ Чăваш патшалăх университечĕн историпе филилоги факультетĕнчен вĕренсе тухнă. Ачасене чăваш чĕлхипе литературине вĕрентнĕ, комсомол тытăмĕнче ĕçленĕ, Шупашкарти çамрăксен общежитийĕнче воспитательте тăрăшнă, республикăри Кĕнеке юратакан обществăна нумай çул ертсе пынă.
Лидия Ковалюк - РФ журналистсен тата РФ писательсен союзĕн членĕ, 8 кĕнеке авторĕ, Алманчă ялĕн хисеплĕ гражданинĕ. Хальхи вăхăтра Лидия Алексеевна Чăваш Республикинчи Писательсен "Хурăнташ" союзĕн председателĕн çумĕнче вăй хурать.
Патăрьел юрри
Паттăрсем çитĕнтеретĕн
Эс, юратнă Патăрьел.
Патăрьел, эс ман тивлетĕм,
Эс - чунри сỹнми хĕвел.
Хушса юрламалли:
Эс каланă пил сăмахĕ
- Пирĕн ỹсĕм пуласси.
Патăрьел - телей çăтмахĕ,
Патăрьел - тĕнче сасси.
Çул çинче те эс пулатăн
Манпала юнашарах.
Çуталса юхать Пăла та
Тĕнчере пĕрре анчах.
Хушса юрламалли.
Мĕн тери илемлĕ, ирĕк
Юрăсем эс янратан.
Çавăнпа пире те çирĕп
Утăмпа утма аван.
Хушса юрламалли.
Тĕпел юрри
Савнă ялăма çула тухсассăн
Шавлă кун сасси те çухалать.
Çĕн пỹртре хăна-вĕрле пухсассăн
Кил тĕпелĕ йăлтăр! çуталать.
Хушса юрламалли:
Тавах, тăван ял-йышăм,
Тавах, тăван кил-йышăм,
Кил вучахĕ пултăр чун ăшши.
Тавах, тăван аттеçĕм,
Тавах, тăван аннеçĕм,
Кил тĕпелĕ пултăр çурт ăшши.
Ял-йышпа çĕклерĕмĕр мăнаçлăн
Çак çурта эпир хăпартланса.
Ĕмĕтпе кил-йыш çỹрерĕ аслăн
Пултаруллă ỹсĕме шанса.
Хушса юрламалли.
Вăрăм çул тăван яла çитет те
Çĕн пỹрте чĕнет йышпа пĕрле.
Ал çупса ташша яма та хатĕр
Тĕпеле иртсен хăна-вĕрле.
Хушса юрламалли.
Источник: "Авангард" (газета Батыревского района)