17 апреля 2018 г.
Алманчăра çуралса ỹснĕ Нина Абрамовăна ял тата район çыннисем вăл пултаруллă та ăста врач-психотерапевт, психиатр пулнипе çеç мар, ырă кăмăллă та çепĕç чунлă çын, сăмах ăсти пулнипе те пĕлеççĕ. Вăтам шкултан ылтăн медальпе вĕренсе тухнă чиперкке аслă шкултан тухтăр дипломне алла илнĕ хыççăн 35 çул Раççейĕн тĕрлĕ кĕтесĕнче хăйĕн специальноçĕпе тăрăшнă. Çак тапхăрта медицина наукисен кандидачĕ çынсен сывлăхне сипленисĕр пуçне вĕсене пурнăçри йывăр лару-тăруран тухмалли мелсем (шел пулин те паян ун пек тĕслĕхсем пайтах тĕл пулаççĕ) пирки те нумай вĕрентнĕ, ăс панă. Тухтăр хăйĕн пациенчĕсене çынна ырă туни, теприн çине вĕчĕ тытманни çеç чун канăçлăхне тупма пулăшнине тăтăшах ăнлантарнă. Çак шухăшсенех автор _ врач-психотерапевт "Счастьем Райской птицы. Çăтмах кайăкĕн телейĕ" ятпа кăларнă ỹкерчĕксемлĕ кĕнекере питĕ туллин уçса парать. Вăтам тата аслă классем валли калăпланă "чун апачĕ" аслисемшĕн те кăсăклă пулĕ. Иртнĕ эрнере автор хăйĕн кĕнекине тăван ял вулавăшне çеç мар, Патăрьелĕнчи тĕп библиотекăн ача-пăча уйрăмне те парнеленĕ.
Источник: "Авангард" (газета Батыревского района)