16 мая 2015 г.
ÇАК çынран чăннипех те ырă тĕслĕх илмелĕх те пур. Çирĕм çул Алманчăри почта çыхăну уйрăмĕн начальникĕнче тăрăшакан М. Аляшкинана çак кунсенче культура учрежденийĕн ĕçченĕсемпе ял тăрăх работникĕсем пысăк наградăна _ Раççей Федерацийĕн çыхăну тата массăллă коммуникацисен министерстин приказĕпе килĕшỹллĕн "Çыхăну мастерĕ" _ хисеплĕ ята тивĕçнĕ сăлтавпа чун-чĕререн саламланă.
Мария Кузьминична çыхăну ĕçĕнче 1994 çултанпа тăрăшать. Вăл ертсе пыракан коллектив районта та кăтартуллисен йышĕнче, çырăнтару кампанийĕсенче те пысăк хастарлăхпа палăраççĕ. Районта тухса тăракан "Авангард" хаçатăн тусĕсем çак ялта ỹссе пыни те вĕсем вулаканпа пĕр чĕлхе тупса ĕçленине çирĕплетет. Сăмах май каласан, çыхăну работникĕ маларахри çулсенче те Хисеп грамотисемпе Тав хучĕсем сахал мар илнĕ, регионсем хушшинче йĕркеленĕ конкурсра та ача амăшĕ хăйне лайăх енĕпе çеç кăтартнă. Виçĕ çул каялла вĕсем чи лайăх çыхăну уйрăмĕ пулни вара ертỹçĕн çаврăнăçуллăхне тепĕр хут çирĕплетет.
Источник: "Авангард" (газета Батыревского района)