04 марта 2015 г.
КУ ЧУХНЕ почтальонкăсен сумкки 10 _ 15 çул каяллахи евĕр тапса та тулса тăмасть. Хаçат-журнал хакĕ те ытти таварсем пекех ỹссе пынăран вулакансен йышĕ сайрални пăшăрхантарать, паллах. Анчах та çав вăхăтрах хăйсен шухăшĕпе çирĕп тăракансем, МИХĕн ытти хаçачĕсемпе пĕрлех районта тухса тăракан "Авангарда" та пĕр çул сиктермесĕр алăран яманни хăпартлантарать. Акă, Патăрьелĕнче пурăнакан А. Леонтьев ĕç ветеранĕ ача чухнех çак хаçатпа туслине çирĕплетет. Упамсара пурăннă вăхăтрах ашшĕпе амăшĕ çак "чун апатне" çырăннине шута илсен, аллă çул ытла та çыхăну тытать унпа! Хăй те ỹркенсе тăмасть, тĕрлĕрен темăпа статьясем те шăрçалать.
Алманчăра пурăнакан Л. Еремеева хаçат тусĕ вара Юхмапа Пăла тăрăхне Шăмăршă районĕнчен качча килнине пăхмасăрах ăна пĕр сиктермесĕр вулать. Лидия Михайловна "Авангарда" 2015 çулхи иккĕмĕш çур çул валли паянхи хаксемпех çырăнма та ĕлкĕрнĕ. Эсир вара çырăнма манман-и?
Источник: "Авангард" (газета Батыревского района)