14 декабря 2013 г.
Алманчăри Н. Федоров фермер хуçалăхĕн ĕне ферминче ирхи 5 сехет иртсенех çынсем калаçни, ĕнесем мĕкĕрни илтĕнет. Кăшт вăхăт иртсен вара сĕт пăрăх тăрăх холодильнике юхма пуçлать. Çапла тепĕр çĕнĕ кун пуçланать.
_ Хальхи вăхăтра хуçалăхра ĕне-выльăх 200 пуç, вĕсенчен сăвăнаканни _ 100. Ĕнесенчен чылайăшĕ ватăлнăран тата сĕт сахал антарнăран 50 пушмак пăру туянма палăртнă, _ пĕлтерет ферма заведующийĕнче 25 çул вăй хуракан Н. Осипов.
Кăçал выльăхсене валли апат çителĕклĕ хатĕрленĕ. Утă, сенаж, пуссыпкă умĕсенчен татăлмасть. Çамрăк пăрусене аталанса кайма сĕтсĕр пуçне биохутăшсем те параççĕ. Пĕлтĕрхипе танлаштарсан сăвăм та, пĕчĕк мăклашкасен ỹт хушаслăхĕ те палăрмаллах ỹснĕ. Паха шĕвеке Хирти Пикшикри "Весна" агросоюза сутаççĕ.
Витесене юлашки çулсенче юсаман. Кăçал ĕнесем тăракан урай хăмисене улăштарнă, тин çут тĕнчене килнĕ пăрусене яракан клеткăсене те йăлтах тепĕр хут тунă. Вĕсене шуратса дезинфекциленĕ. Хальхи вăхăтра та юсав ĕçĕсем вĕçленмен-ха: строительсен бригади шыв пăрăхĕсене вырнаçтарать. Алăксене, чỹречесене çĕнетнĕ. Сĕт блокĕнче те çулла ĕçлени сисĕнет: хăйпăннă плитасене çыпăçтарнă. Çавăн пекех чир-чĕр ересрен профилактика мероприятийĕсене пурнăçласах тăраççĕ. Э. Киргизова выльăх тухтăрĕ сывлăх енчен кăшт хавшанисене çийĕнчех сиплет.
Фермăра халь вăй хуракансем çителĕклĕ. Ĕне сăвакансем çеç пиллĕкĕн, вĕсенчен пĕри пурне те черетпе кантарать, пăрусем патĕнче виççĕн. Кашни хăйĕн ĕçне тивĕçлĕ шайра тума тăрăшать. Чылайăшĕ кунта нумай çул вăй хурать.
О. ПАВЛОВА
Источник: "Авангард" (газета Батыревского района)