Публикации » СĂВАПЛĂ ВЫРĂНТА çĕНĕ çУРТ ХАТĕР

19 июня 2013 г.

 Алманчă ял тăрăх пуçлăхĕ Г. Фомин пуçарăвĕпе иртнĕ çулхи кĕркунне ял масарĕн çĕнĕ çурт никĕсне ярса хăварнă. Пикеннĕ ĕç юр айĕнчех юлман. Ака-суха ĕçĕсем вĕçленнĕ хыççăн майăн 17-мĕшĕнче ял хастарĕсем каллех нимене пикеннĕ. Ыр кăмăллăхпа ĕçе хутшăнакансем сахалăнах пулман: аллă çынна яхăнах. Ăстасем çурта пĕр эрне хушшинчех туса, тирпейлесе пĕтернĕ. Çветтуй Троица праçникĕ тĕлне ăна светит туса уçасшăн. Сăмах май каласан, сăваплă вырăна тирпей-илем кĕртес тĕллевпе уйрăм çынсем те чылай хастарлăх кăтартнă. Масар варрине В. Сымкин хатĕрленĕ юман хĕресе вырнаçтарнă. Г. Петров ял тăрăх депутачĕ çурт патне пыракан çула тирпейлеме пулăшнă. Халăх вăйĕпех картасене тытнă. Ĕмĕрлĕх канлĕх тупакан вырăна халăхпа пĕрле пăхса тăнине ырламалла çеç.

А. НИКОЛАЕВА

Источник: "Авангард" (газета Батыревского района)