28 августа 2015 г.
Совет Союзĕн Геройĕ Мирон Ефимович Ефимов çуралнăранпа августăн 27-мĕшĕнче 100 çул çитрĕ. Çак куна халалласа музейра «Тăван çĕршывăн ывăлĕ» курав йĕркелерĕмĕр. Ăна савăнăçлă лару-тăрура уçрăмăр. Кунта ентешĕмĕр пурнăçĕпе интересленекенсем йышлăн пухăнчĕç.
Вăл 1915 çулта Самушка ялĕнче хресчен çемйинче кун çути курнă. Мирон Ефимов - летчик, Хура тинĕс флочĕн çарпа сывлăш çарĕн 18-мĕш авиаци полкĕн командирĕ. Ентеш тинĕс-çар флотĕнче 1936 çултанпа службăра тăнă. 1939 çулта Ейскри тинĕс-çар авиаци училищине вĕренсе пĕтернĕ. Тăван çĕршывăн Аслă вăрçи пуçлансан фронта тухса кайнă. Мирон Ефимов аслă лейтенант 1942 çулта 112 хутчен вĕçнĕ, вĕсенчен 78-шĕ - тăшмана хирĕç. Тĕплĕнрех ентеш пурнăçĕпе пултарулăхĕ çинчен куравра пĕлме пулать.
Источник: "Пурнăç çулĕпе" Аликовская районная газета