26 июля 2014 г.
Районта тыр-пул пухса кĕртес ĕçсем пуçланчĕç. Вырмана пуринчен малтан «Авангард» ял хуçалăх кооперативĕ тата «Рабия» агрофирма тухрĕç. Вĕсенче халĕ кĕрхи культурăсене выраççĕ.
«Рабия» агрофирмăн кăçал тĕш тырă тата пăрçа йышши культурăсене 1357 гектар çинчен пухса кĕртмелле, çак шутран 500 гектарĕ - кĕрхисем. Хирте виçĕ комбайн çаврăм хыççăн çаврăм тăвать: пĕри - «Полесье», тепĕр иккĕшĕ - «Агрос-530». Паянхи куна 40 гектара яхăн кĕрхи тулă вырнă, вăтам тухăç - гектартан 20 центнер.
«Авангард» хуçалăхра тĕш тырăсене 678 гектар çинчен пухса кĕртмелле. Уйра «Вектор» тата «Дон-1500Б» комбайнсем ĕçлеççĕ. Штурвал умĕнче М.Моисеевпа А.Корнилов опытлă комбайнерсем.
Ял ĕçченĕсем вырма ĕçĕсене вăхăтра та йĕркеллĕ ирттерессишĕн тăрăшаççĕ.