20 сентября 2016 г.
Сентябрĕн 13-15-мĕшĕсенче «Хĕлхем» спорт шкулĕн стадионĕнче районти вĕренÿ учрежденийĕсенчи хĕрсемпе каччăсем хушшинче Ураскилт чиркÿ уявне халалласа çулсеренех иртекен мини-футбол турнирĕн умĕнхи тапхăрĕ иртрĕ. Турнира хутшăнакансем виçĕ зонăна пайланса вылярĕç. Çĕнтерÿçĕсем финал тапхăрне лекрĕç.
Ытларикун, сентябрĕн 13-мĕшĕнче, вăйăсенче Элĕк шкулĕн хĕрĕсемпе каччисем маттур пулчĕç. Юнкун вара Шĕмшеш шкулĕн хастарĕсене çитекенни пулмарĕ. Сентябрĕн 15-мĕшĕнче виççĕмĕш зонăн вăййисенче Мăн Ямаш тата Мăн Вылă шкулĕсенче вĕренекенсем финала тухрĕç. Йăлана кĕнĕ тăрăх, Ураскилт вăтам шкулĕн спортсменĕсем те тÿрремĕнех финала тухаççĕ.
Çулсеренех Ураскилтре сентябрĕн 21-мĕшĕнче шкул стадионĕнче Таса Турă Амăшĕн çуралнă кунне халлалласа спорт ăмăртăвĕ иртет.
Источник: "Пурнăç çулĕпе" Аликовская районная газета