07 июля 2015 г.
Чăваш Енре 2016 çулхи августăн 1-15-мĕшĕсенче Пĕтĕм Раççейри ял хуçалăх çыравĕ иртет. Ун чухне ял хуçалăх предприятийĕсене, фермăсемпе хушма хуçалăхсене, выльăх-чĕрлĕхпе чăх-чĕп хисепне, çавăн пекех сухаланă çĕрсене, сад-пахчана, теплицăсене, пушă выртакан çĕрсене шутлĕç.
Çыравра ял çыннисенчен ял хуçалăх техники, ĕçченсем çинчен те ыйтса пĕлĕç. Çавăн пекех сĕт, пахча çимĕç тата ытти продукцие хăйсене мĕн чухлĕ хăварнипе те интересленĕç. Çак кăтартусем патшалăха ял хуçалăх стратегине аталантарма кирлĕ.
Малтанхи кăтартусем тăрăх, çырав тăвакансен 700 ытла ял хуçалăх организацине, 9000 хресчен-фермер хуçалăхне, 800 дача тата сад пĕрлешĕвне çитмелле пулать. Халĕ списоксене йĕркелес ĕç пырать. Чăвашстат ертÿçи Эльвира Максимова пĕлтернĕ тăрăх, ял хуçалăх çыравĕ ведомствăсем хушшинче те тачă çыхăнура ĕçленине комиссире пăхса тухнă. Ларăва Чăваш Ен премьер-министрĕ Иван Моторин та хутшăннă. Вăл муниципалитет пĕрлешĕвĕсен администрацийĕсен пуçлăхĕсене çыравра яваплăха туйса ĕçлемеллине асăрхаттарнă.
Источник: "Пурнăç çулĕпе" Аликовская районная газета