08 мая 2015 г.
Майăн 3-мĕшĕнче Элĕкри «Хĕлхем» физкультурăпа спорт комплексĕн стадионĕнче РСФСР тава тивĕçлĕ тренерĕ Василий Семенов ячĕпе тата Аслă Çĕнтерĕве халалласа хăвăрт утакансен республикăри ăмртăвĕ иртрĕ. Кăçалхипе вăл 3-мĕш хут районсенчи тата кÿршĕллĕ республикăсенчи çамрăк спортсменсене пуçтарать. Хальхинче 100 ытла спортсмен старта тухрĕ.
Ăмăртăва савăнăçлă лару-тăрура уçрĕç. Кунта Чăваш Республикин физкультурăпа спорт министрĕ Сергей Мельников килсе çитрĕ. «Çĕнтерÿ кунĕ умĕн çакăн пек ăмăртусем ирттерни пысăк пĕлтерĕшлĕ. Василий Семенов хăй вăхăтĕнче чăн-чăн çĕнтерÿçĕсене, хăйсен ĕçне парăннă спортсменсене хатĕрленĕ. Паянхи çамрăксенчен çĕршыв ячĕ-сумĕ килет», - терĕ Сергей Владимирович ăмăрту умĕн. Район администрацийĕн пуçлăхĕ Александр Куликов ăмăртăва хутшăнакансене ăнăçу сунчĕ. «Элĕксем пĕртăван Семеновсен ячĕпе мухтанаççĕ. Василий Семенов республикăра хăвăрт утассине никĕслекенĕ, тата вăл чылай СССР тата Раççей спорт мастерĕ хатĕрленĕ. Çамрăк ăрăвăн паллă спортсменсенчен тĕслĕх илмелле, çавăн пекех пысăк çитĕнÿсем тума тăрăшмалла», - терĕ Александр Николаевич.
Пирĕн ентеше сума суса спортра палăрнă чылай хăна килнĕ. Вĕсем хушшинче хăвăрт утассипе тĕнче тата Европа чемпионки Алина Иванова, тĕнче класлă спорт мастерĕ, РСФСР халăхĕсен çуллахи 8-мĕш спартакиадин призерĕ Олег Андреев, Шупашкарти Олимп резервĕсен училищин директорĕ Юрий Плотников, Олимп вăййисен призерĕ Владимир Андреев, тĕнче класлă спорт мастерĕ, виçĕ хутчен тĕнче рекордсменки Александра Девиринская, нумай хутчен СССР тата Раççей чемпионки Фаина Краснова, «Элĕк ен» ентешлĕх ертÿçи Владимир Иванов пулчĕç.
Старта тухнисем хушшинче хĕрÿ тупăшу иртрĕ. Çамрăк спортсменсем хăвăрт утассипе тата чупассипе тупăшрĕç. Çĕнтерÿçĕсене çулĕсене кура виçĕ ушкăнра палăртрĕç. Хальхинче Мордва Республикинчен килнĕ çамрăк спортсменсем çаврăнăçуллăрах пулчĕç, малти вырăнсене çĕнсе илме пултарчĕç. Элĕксенчен хĕрачасем хушшинче Анастасия Дубинина (1-мĕш вырăн) тата Анастасия Никитина (3-мĕш вырăн), арçын ачасенчен Евгений Федоровпа (2-мĕш вырăн) Денис Иванов (3-мĕш вырăн) çĕнтерÿçĕсен йышне кĕчĕç. Çавăн пекех йĕркелÿ комитечĕ ăмăртура палăрнисене çăмăл атлетикăпа Шупашкарта иртекен Европăри команда чемпионатне кайса курма сертификатсем пачĕ.
Спорт уявне пухăннисен кăмăлне хаваслă юрă-кĕвĕ çĕклерĕ. Кунта «полевая кухня» та йĕркеленĕ. Уçă сывлăшра салтак пăттине тутанса пăхма уйрăмах кăмăллă пулчĕ. Паллах, спорт уявĕ Василий Семенов тăванĕсем Виктор Семеновичпа Геннадий Семенович тăрăшмасăр иртмен. Аслă пиччĕшĕн пуçарăвне сÿнме паманнишĕн, çĕнĕ «çăлтăрсем» тупса чĕртсе янишĕн вĕсем чĕререн тухакан тав сăмахĕсене тивĕç. Тен, паянхи çамрăксен ячĕсене çитес çулсенче тĕнче шайĕнче илтме тÿр килĕ. «Элĕк ен» ентешлĕх ертÿçи Владимир Иванов калашле «çапла пултăрччĕ!»
Марина Леонтьева.
Источник: "Пурнăç çулĕпе" Аликовская районная газета