21 декабря 2013 г.
Иртнĕ кунсенче Çĕнĕ Шупашкарта хĕрсемпе яшсен республикăри чемпионачĕ иртрĕ. Унта тĕрлĕ çулсенчи боксерсем хутшăнчĕç. Пурĕ 200-е яхăн çамрăк хăйĕн ăсталăхне кăтартрĕ.Тăватă куна пынă ăмăртура пирĕн районти «Хĕлхем» спорт комплексĕн боксерĕсем те активлăхпа палăрчĕç, лайăх кăтартусемпе савăнтарчĕç. 1989 çулхи çамрăксен хушшинче Элĕк шкулĕнче вĕренекен Анатолий Данилов 54 килограмлă виçере республикăн чемпионĕ пулса тăчĕ. Çак виçерех Мăн Вылă шкулĕнче 9 класра пĕлÿ илекен Юрий Степанов хĕрÿ кĕрешÿре Çĕнĕ Шупашкарти боксерпа ринга тухрĕ, виççĕмĕш вырăн çĕнсе илчĕ. Çак шкулта ăс пухакан 1997 çулта çуралнă Денис Григорьевский 69 килограмлă виçере Канаш спортсменне çĕнтереймерĕ пулсан та пуçа усмарĕ, малаллахи тĕллевсене палăртса хучĕ.
Çак ăмăртăва Шĕмшеш шкулĕнчи çамрăк боксерсем те хутшăнчĕç. 91 килограмлă виçере вуннăмĕш класри Максим Мамуткин кĕрешрĕ. Каччă Шупашкар хулинчи «Динамо» обществăн боксерне выляса ярса иккĕмĕш вырăна тухрĕ.
Спортра чăтăмлăхпа çирĕплĕх туптанать, йывăрлăхсене çĕнтерсе палăртса хуни патне ăнтăлма хăнăхтарать. Юлашки вăхăтра каччăсем кăмăллакан спорта хĕрсем туртăнни те куç кĕрет. Бокс секцине çÿрекенсем йышланса пыраççĕ. Республика чемпионатĕнче хĕрсем хушшинче те бокс ăмăртăвĕсем хĕрÿ иртрĕç. Элĕк районĕн чысне виçĕ хĕр хÿтĕлерĕ. Элĕк шкулĕнче вуннăмĕш класра вĕренекен Кристина Иванова çĕнтерÿçĕ ятне илчĕ, малти вырăна тухрĕ. Тăххăрмĕш класри Анастасия Мурзакова та çивĕч кĕрешÿре иккĕмĕш вырăн çĕнсе илчĕ. Шĕмшеш шкулĕнче пĕлÿ илекен Надежда Иванова иккĕмĕш пулса тăчĕ.
Çамрăк боксерсем, уйрăмах пĕрремĕшпе иккĕмĕш вырăнсене çĕнсе илнисем, 2014 çулхи февраль уйăхĕнче Атăл тăрăхĕнчи регионсем хушшинчи ăмăртусенче кĕрешĕве тухĕç.
В.ГОРДЕЕВ, тренер.
Источник: "Пурнăç çулĕпе" Аликовская районная газета