12 августа 2013 г.
Элĕк тăрăхĕнче Яккушкăнь ялĕнче çуралса ÿснĕ, халĕ Çĕнĕ Шупашкарти Олимп
резервĕн 3-мĕш номерлĕ спорт шкулĕнче вĕрентекенре тăрăшакан Михаил Кузнецов
район чысĕпе мухтавĕ. Вăл тĕнчипе палăрнă 2010-2011 çулсенче континетăн чи лайăх
50 тренерĕ шутне кĕнĕ.
Пирĕн район ятне çĕклекенсем татах та пур-и; Акă Элĕк тăрăхĕнчен тухнă пĕр
тăван Семеновсем çинчен (утас енĕпе палăрнă) пурте илтнĕ ĕнтĕ. Виççĕшĕ те Мăн
Вылă ялĕнчен. Геннадий Семенович – тренер, çăмăл атлетикăпа СССР спорт мастерĕ
(1970), РСФСР (1984) тата СССР (1991) тава тивĕçлĕ тренерĕ, ЧР физкультурăпа
спортăн тава тивĕçлĕ ĕçченĕ (1982). Вăл 50 ытла спорт мастерĕ, çав шутра 2 тава
тивĕçлĕ тата СССРпа Раççейĕн тĕнче класлă 20 ытла спорт мастерĕ хатĕрленĕ, вĕсен
хушшинче – тĕнче рекордсменки А.Иванова тата кĕмĕл çĕнсе илнĕ Е.Николаева (1992
çулхи çуллахи XXV Олимп вăййисем).
Василий Семенович – тренер, çăмăл атлетикăпа СССР спорт мастерĕ (1963), РСФСР
тава тивĕçлĕ тренерĕ (1978). «Хисеп палли» ордена тивĕçнĕ. Утассипе темиçе хут
та Чăваш Енĕн чемпионĕ пулнă спортсмен çăмăл атлетикăра 70 ытла СССР тата Раççей
спортăн мастерне, 8 СССР чемпионне хатĕрленĕ, вăл шутра – Европăпа СССР
чемпионки Г.Романова тата В.Семенов.
Виктор Семенович – тренер, çăмăл атлетикăпа СССР спортăн тĕнче класлă мастерĕ
(1975), чемпион (1975,1987), 20 километр утассипе СССР рекордсменĕ тата СССР
Кубокне çĕнсе илекенĕ (1975,1978,1983), РФ физкультурăпа спортăн тава тивĕçлĕ
ĕçченĕ (1993), РСФСР (1990) тата СССР (1992) тава тивĕçлĕ тренерĕ, педагогика
наукисен кандидачĕ. Вунă спорт мастерĕ хатĕрленĕ, вăл шутра – çуллахи XXV Олимп
вăййисен çăмăл атлетикăри призерĕ Е.Николаева.
Вениамин Петрович Николаев (Чулкаç) – спортсмен, çăмăл атлектикăпа СССР
спортăн тĕнче класлă мастерĕ (1984), утассипе СССР чемпионĕ (1987).
Элĕк районĕ бокспа та палăрса тăрать. 1997 çултанпа унта çулсерен Республика
турнирĕсем иртеççĕ. Чи малтанхи бокс секцине Владимир Гордеев (1978 çулта СССР
спорт мастерĕ, 1997 çулта ЧР физкультурăпа спортăн тава тивĕçлĕ ĕçченĕ ятсене
тивĕçнĕ) пуçарса янă. 1987 çулта Элĕкре бокс енĕпе ачасемпе çамрăксен спорт
шкулĕ уçăлать, ăна шăпах Владимир Алексеевич ертсе пырать. Унăн спортра палăрнă
вĕренекенĕсем: Олег Павлов, Валера Матвеев, Иван Григорьев, Борис Максимов.
Çулсеренех ăмăртусенче Дмитрий Яковлев, Евгений Петров, Алексей Еремеев
çамрăк боксерсен ячĕсене илтме пулать. Элĕк районĕнчен бокс енĕпе спорт мастерĕн
16 кандидачĕ тухнă.
В.ЭЛИМЕ.