Публикации » Тавралăха хăтлăх кĕртеççĕ

01 августа 2017 г.

Питĕшкасси ял тăрăхĕнче пурăнакансем ĕçченлĕхпе палăраççĕ. Пĕр самант та ахаль лармаççĕ вĕсем. Ĕçлеме те пĕлеççĕ, канăва та усăллă ирттереççĕ. Шăрăх çу кунĕсенче Анаткас Çулавăç плотининче шыва кĕреççĕ. Çу кунĕсенче кунтан çын татăлма та пĕлмест. Шел пулин те, лайăххипе пĕрле юнашарах кăмăла хуçаканни те пур. Хăшĕ-пĕри каннă хыççăн çÿп-çапа пăрахса хăварать. Тавралăха хăтлăх кĕртес тĕллевпе июлĕн 28-мĕшĕнче ял тăрăхĕн ĕçченĕсемпе ял хастарĕсем плотина çывăхĕнчи территорие тасатса тирпейленĕ. Аслисен ырă пуçарăвне ачасем те курса ÿсеççĕ. Çакă çут çанталăка юратма, хисеплеме вĕрентнине пытармаççĕ ку тăрăхра пурăнакансем.

Источник: "Пурнăç çулĕпе" Аликовская районная газета