30 июня 2017 г.
Федерацин тĕллевлĕ «Жилище» программипе килĕшÿллĕн Раççейри çамрăк çемьесене пурăнмалли кил-çуртлă пулма патшалăх пулăшăвĕпе тивĕçтереççĕ.
Иртнĕ кунсенче пирĕн районти çемьесене социаллă тÿлев илме савăнăçлă лару-тăрура свидетельствăсем пачĕç. Район администрацийĕн пуçлăхĕ Александр Куликов çав ятпа çамрăксене саламларĕ. Пирĕн районтах кил-çурт çавăрса тăван çĕр çинчех ĕçлеме сĕнчĕ. «Сирĕн килĕрсенче ача сасси ан татăлтăр, Çемьере килĕшÿ, телей сунатăп. Кил-çурт условийĕсене ла- йăхлатма ăнăçу пултăр», - терĕ вăл. Кăçал çав свидетельствăсене илме Элĕк ял тăрăхĕнчи Ефимовсен, Ивановсен, Романовсен, Терентьевсен, Филипповсен, Мăн Вылăри Николаевсен, Ехремкассинчи Никифоровсен, Питĕшкасси ял тăрăхĕнчи Павловсен тата Ураскилтри Капитоновсен çемйисем тивĕçрĕç. Пĕтĕмпе вĕсем 5 млн. та 647 пин те 320 тенкĕлĕх пулăшу илчĕç.