11 апреля 2017 г.
Террризм хăрушă пулăм пулнине апрелĕн 3-мĕшĕнче Санкт-Петербургри метрополитенра пулнă теракт тепĕр хут çирĕплетсе пачĕ. Мĕн чухлĕ юн тата куççуль, пурăнса çитереймен çулсем. Чылайăшĕ мăшăрне, ачине, çывăх тăванне çухатрĕ çак хăрушă кун.
Апрелĕн 8-мĕшĕнче Шупашкарти Республика лапа- мĕнче «Эпир террора хирĕç» обществăлла акци иртрĕ. Ăна «Хастар çамрăксен Союзĕ» организаци пуçарăвĕпе йĕркеленĕ. Вилнисене асăнса республикăра пурăнакан 7 пин ытла çын акцие хутшăнчĕ. Çынсем мероприяти пуçланичченех лапама пуçтарăнчĕç. Унта шкул ачисем, студентсем, власть, обществăлла организаци, политика партийĕн представителĕсем, ĕç коллективĕсем, тивĕçлĕ канурисем пухăнчĕç. Кашнин сăн-питĕнче - хурлăх, куляну.
Санкт-Петербургри теракт - пĕтĕм çĕршыв хуйхи. Унран никам та аякка тăрса юлаймасть. Митинга пухăннисем, миçе çултине, хăш политикăра тăнине пăхмасăр, йывăр вăхăтра пĕрне-пĕри пулăшма пултарнине çирĕплетсе пачĕç. Вĕсем палăк умне чĕрĕ чечексем хучĕç, çуртасем çутрĕç, вилнисене асăнса пĕр минут шăп тăчĕç, таса пĕлĕте шурă хăмпăсем ячĕç.
Раççейри чылай хулара террорла актсенче вилнисене асăнса акци иртет. Унăн тĕп тĕллевĕ - власть органĕсемпе обществăн вăйне террора хирĕç пĕрлештересси, халăха çакăн йышши çивĕч ыйтусене татса пама, çитĕнсе пыракан ăрăва тĕрлĕ нацие тата тĕн конфессийĕсен представителĕсене хисеплеме вĕрентесси.