21 марта 2017 г.
Тавралăх чĕрĕлме тытăннă вăхăт кăмăла çĕклет. Ăшă енчен кайăксем пирĕн еннелле килсех тăраççĕ. Ĕлĕкренех пыракан йăлапа çак вăхăтра çурхи сунар уçăлать. Çак тапхăр вăрăм мар. Вăл апрелĕн 15-мĕшĕнчен пуçласа 24-мĕшĕччен пырĕ. Республикăра çак тапхăрта хур-кăвакала тата кăрăпчака тытма ирĕк панă.
Çурхи сунара тухмалли путевкăна мартăн 15-мĕшĕнчен пама тытăннă. Çакна шута илмелле: сунарта хур-кăвакала йытăсăр тытмалла. Сунар йыттисемпе шырав ĕçĕнче çеç усă курмалла. Çавăн пекех сунара кимĕсемпе тухмалла мар. Ăна хур-кăвакала сыхлама, аманнине шывран туртса кăларнă чухне усă курни те саккуна пăсни пулать. 10 кун хушшинче хур кайăксене сунарçăсем икшерĕн тытма ирĕк пур. Хур-кăвакала ушкăнпа вĕçсе пынă чухне пăлхантарма юрамасть. Вĕсене утса пынă чухне мар, пытанса ларса хур кĕлеткесемпе, макетсемпе усă курса тытма юрать. Хурсене, сăмахран, юхан шывсемпе кÿлĕсем, утравсем çинче, Атăл тата Сăр çыранĕсенче тытма юрамасть. Пăшалсем чехолсенче пулмалла.
Хĕллехи сунар вĕçленчĕ. Апла пулин те хăшĕ-пĕри халĕ те путевкăсене парса пĕтермен-ха. Март уйăхĕн вĕçĕччен взноссене тÿлемеллине те ан манăр. Путевкăсене вăхăтра илмеллине те асра тытăр. Сунар йĕркисене пăсмалли марри çинчен тăтăшах асăрхаттарса тăратпăр. Сунар пуçланас умĕн пуху ирттеретпĕр. Малашне мĕнле ĕçлесе пырассине, саккуна пăхăнмаллине, çут çанталăка сыхласа хăвармаллине пăхса тухатпăр. Çакна та палăртас килет: путевкăра мĕнле çырнă, сунарта çав чĕр чунсемпе кайăксене çеç тытма юрать.
Юлашки вăхăтра районта сунар йыттисем çухалнă тĕслĕхсем пулчĕç. Сунар йытти - харпăр хăйĕн пурлăхĕ. Çавăнпа та ăна вăрттăн сутни саккунпа килĕшсе тăмасть, уншăн явап тыттараççĕ. Енчен те район çыннисем урамра ирĕккĕн чупса çÿрекен сунар йыттисене курсан районти сунарçăсен обществине пĕлтермелле.
Геннадий Деомидов,
районти сунарçăсемпе пулăçсен обществин ертÿçи.