14 апреля 2016 г.
Паян - Космонавтика кунĕ. 1961 çулхи апрелĕн 12-мĕшĕ. Ирхи ултă сехет. Казахстанри Байконур космодром... Юрий Гагарин «Восток» уçлăх карапĕпе тĕнчере пĕрремĕш хут çĕр чăмăрĕ тавра çаврăннă. Тепĕр çулталăкран çак куна патшалăх уявĕ тесе йышăннă. Кăçал тĕнче уçлăхне пирвайхи хут вĕçнĕренпе 55 çул çитрĕ.
Космонавтика кунне Чăваш Енре кашни çулах анлă паллă тăваççĕ. Çак кун космонавтика ветеранĕсемшĕн уйрăмах пысăк пĕлтерĕшлĕ. Чăваш Ен - тĕнчери 3-мĕш космонавтăн Андриян Николаевăн тăван çĕрĕ. Унсăр пуçне пирĕн тепĕр икĕ ентеш - Николай Бударинпа Муса Манаров уçлăха парăнтарнă.
Апрелĕн 12-мĕшĕнче пирĕн çĕршыв этемлĕхĕн чи çутă ĕмĕтне пурнăçа кĕртсе инçетри çăлтăрсем патне чи малтан çул хывнă. Юрий Гагарин уçлăха вĕçни космонавтика аталанăвĕнче палăрмаллах мала иртме май панă тата Хĕвел тытăмне хастарлăн тĕпчеме хавхалану кÿнĕ. Пирĕн республикăра пурăнакан кашни çын Чăваш Енĕн тĕнче уçлăхне парăнтарнă мухтавлă ывăлĕсемпе тивĕçлипе мăнаçланать.
Уçлăха пуçласа çул хывакансен пысăк çитĕнĕвĕсем пирĕншĕн чăн-чăн ырă тĕслĕх пулса тăраççĕ. Манăçми пулăмпа çырăнса юлнă çак кун республикăра тĕрлĕ мероприяти иртет. Çулсеренех Шупашкарти Юрий Гагарин, Андриян Николаев палăкĕсем умĕнче, Шуршăлти Космонавтика музейĕн мемориал комплексĕнче тĕпуявсем пулаççĕ. Унта çăлтăрсем патне йывăр та тумхахлă çул хывнă паттăрсене асăнма космодромсенче хĕсметре тăнă ветерансем, Чăваш Енри çамрăк космонавтсен отрячĕсем хутшăнаççĕ.
Космонавтика кунĕнче районти библиотекăсенче куравсем йĕркелерĕç. Библиотекарьсем ачасемпе викторинăсемпе конкурссем ирттерчĕç. Ачасем районти литературăпа краеведени музейĕнче «Космонавтика кунĕ» калаçăва хастар хутшăнчĕç тата «Космоса çул хывар!» викторинăра палăрчĕç.
В.СИВВИ.
Источник: "Пурнăç çулĕпе" Аликовская районная газета