13 февраля 2014 г.
Сывлăха упрани, ăна çирĕплетни уйрăмах пĕлтерĕшлĕ. Çакна Ярхунушкăнь, Сурăмварри ялĕсенче пурăнакансем аван ăнланаççĕ. Тĕрлĕ яваплă ĕçсенче тăрăшнă, халĕ килти хушма хуçалăха аталантаракан аслă ăрури çынсем çан-çурăма çирĕплетес, хускану ытларах тăвас тĕллевпе каçсерен темиçе çухрăм утаççĕ. Ку енĕпе уйрăмах Соколикпа Цилия Майоровсем, Мария Ильина, Татьяна Курбатова, Елизавета Андреева пуçарулăх кăтартаççĕ. Аслă çулсенчи Анна Васильевапа Валентина Анатольева ал-ура сыпписем ыратнине хускану туса сиплеме тăрăшаççĕ.
Çавăн пекех Сурăмварринчи Валентина Семенова, Григорийпа Надежда Терентьевсем, Зоя Исаева, Маргарита Кириллова тĕп çул тăрăх темиçе çухрăм хыçа хăвараççĕ.
Н.ДАНИЛОВА, Крымсарайка ял тăрăхĕн пуçлăхĕн çумĕ.
Источник: "Пурнăç çулĕпе" Аликовская районная газета