08 февраля 2014 г.
90 çулхи юбилей ячĕпе Юманлăхри Анна Варфоломеевнăна районти вĕренÿ пайĕн ертÿçи Э.Николаев, Ехремкасси ял тăрăхĕн пуçлăхĕ В.Ефимов тата ыттисем саламланă. А.Варфоломеева çак ялтах 1924 çулхи нарăсăн 1-мĕшĕнче çуралнă. Вырăнти шкулта вĕреннĕ. Хыççăн Шупашкар районĕнчи Кÿкеçре пĕлÿ пухать. Тăван çĕр-шывăн Аслă вăрçин çулĕсене колхозра вăй хурать, арçынсемпе танах вăрманта йывăç касса хатĕрлет. Ехремкассинчи фельдшер-акушер пунктĕнче санитаркăра 37 çул тимлет.
1950-мĕш çулта Аслă вăрçăран таврăннă Авраам Семеновпа пĕрлешсе çемье чăмăртаççĕ. Мăшăрĕ Тени шкулĕнче ачасене вĕрентет, каярахпа директор та пулать. Мăшăрĕсем виçĕ ача пăхса ÿстереççĕ. Шел, пĕр-пĕринпе 62 çул килĕштерсе пурăннă хыççăн упăшки икĕ çул каярах çут тĕнчерен уйрăлса кайнă.
Источник: "Пурнăç çулĕпе" Аликовская районная газета