19 июня 2015 г.
Тухтăр ĕçĕ чи кирлисенчен, чи йывăррисенчен, чи яваплисенчен пĕри. Унăн тĕллевĕ - чир-чĕре тупса палăртасси, сыватасси. Манăн сăмахăм районти тĕп больницăра офтальмологра тăрăшакан Татьяна Юрьевна Федорова пирки. Çепĕç чĕлхеллĕ тухтăр хăйĕн патне килекен кашни çынпа ăшшăн калаçать, пурне те усăллă канаш, пулăшу пама васкать.
Татьяна Федорова хăйĕн кун-çулне районти тĕп больницăпа 2010 çулта çыхăнтарнă. И. Н. Ульянов ячĕллĕ Чă-ваш патшалăх университечĕн медицина факультетĕнчен вĕренсе тухсан тÿрех кунта ĕçлеме килнĕ.
- Медицина ĕçченĕн профессине суйласа илни ăнсăртран мар. Манăн анне чылай çул районти тĕп больницăра медицина сестринче тăрăшнă. Инна йăмăкăм та тухтăр профессине суйласа илнĕ, вăл та кунтах дерматовенеролог пулса ĕçлет, - çывăх çыннисемпе паллаштарчĕ Татьяна Федорова.
Кăçалхи март уйăхĕн вĕçĕнчен Татьяна Юрьевна район больницин тĕп врачĕн çумĕ пулса тăрать, офтальмолог профессине те хăвармасть, кунта çур ставкăпа тăрăшать. Тĕп врач çумĕнче вăй хунă май тĕрлĕ ĕçсене йĕркелесе пыма тивет унăн. Ĕçлени, тăрăшни сая каймасть. Район больницинче диспансеризаци витĕр кăларнă çынсен шучĕ те ÿснĕ. Кунсеренех ун патне çынсем тĕрлĕ ыйтупа килеççĕ. Халăха медицина пулăшăвĕ парасси уншăн тĕп тĕллевсенчен пĕри. Кашни кун ĕçе савăк кăмăлпа çÿренĕрен, коллективра пĕр çемьери пек пурăннăран, çынна ыр тума пултарнăран чунтанах савăнать вăл.
- Тухтăр профессине алла илнĕ çын кашни кунах ырă ĕç тăвать. Унăн чи кирлĕ енĕ - çынна юратма, хĕрхенме пĕлни, тивĕçĕ - чирлĕ çыннăн ыратăвне çăмăллатни. Мана кулленех ĕçре тĕп врач Василиса Архипова тата унăн çумĕ Ирина Эриванова пулăшса пыраççĕ, - тет Татьяна Федорова.
Нумаях пулмасть «Земство тухтăрĕ» программăпа çамрăк специалиста кил-çурт туянма свидетельство пани татах та тăрăшса ĕçлеме хавхалантарнине пытармарĕ. Вăл нихăçан та пĕр вырăнта лармасть, больницăра иртекен кашни спорт мероприятине, обществăлла ĕçсене хутшăнать. Вăл ĕçре кăна мар, çемьере те телейлĕ хĕрарăм - юратнă мăшăр тата анне.
Вера МОРОЗОВА.
Источник: "Пирěн пурнăç"