04 июня 2014 г.
Çу уйăхĕн 30-мĕшĕнче Смородино ялĕ çывăхĕнчи вăрман уçланкинче районти педагогсен «Пĕлÿ кунĕ» уяв иртрĕ. Пухăннисене район администрацийĕн пуçлăхĕ Александр Куликов саламларĕ. Тавăтри Б.С.Марков ячĕллĕ вăтам шкулти чăваш чĕлхипе литературине вĕрентекен Р.Агафоновăна, Мăн Вылă шкулĕнчи химипе биологи учительницине Т.Терентьевăна, райадминистрацин опекăпа попечительство енĕпе ĕçлекен тĕп специалист-экспертне И.Ильинана, ачасемпе çамрăксен пултарулăх центрĕн директорне Е.Ивановăна Чăваш Республикин Вĕренÿ тата çамрăксен политикин Хисеп хучĕпе чысларĕç. Çавăн пекех районта иртнĕ конкурссенче çĕнтернĕ вĕрентекенсем район администрацийĕн Хисеп хучĕсене, вĕренÿ пайĕн тав çырăвĕсене тивĕçрĕç.
Уçланкăри уяв спорт вăййисемпе, чăваш эстрадин хаваслă юрри-кĕввипе вĕçленчĕ.
Источник: "Пурнăç çулĕпе" Аликовская районная газета