16:05 03 февраля 2023 г.
Москакасси культура Çурчĕ çумĕнче йĕркеленнĕ «Эчкерен çăлтăрĕсем» эстрада ушкăнĕн артисчĕсем çултан-çул хăйсен репертуарне анлăлатса та пуянлатса пыраççĕ. Кăçалхи çул çĕнĕ юрăсемпе пуянлатрĕç программăна. Февралĕн 2-мĕшĕнче вĕсем Шатракасси тăрăхĕнче пурăнакансене савăнтарса та тĕлĕнтерсе килчĕç. Кунти клубра тахçанах пулманччĕ-ха çак ушкăн. Артистсене çав тери ăшă кăмăлпа кĕтсе илчĕ кунта вăй хуракан Надежда Ершова.
Концерт программине Евгений Тимофеев «Кăмăл» юрăпа илемлĕн шăрантарса уçрĕ. Çавăн пекех залра ларакансене Вера Макарова, Галина Вастрюкова, Юлия Ермакова, Галина Голубева тата çамрăк хĕрачасен ушкăнĕ илемлĕ юрăсемпе тыткăнларĕç. «Калинка» ташă ушкăнĕ эстрада ташшисемпе куракансен кăмăлĕсене уçрĕ. Залра ларакансене те ертсе пыракан Галина Голубева «Хăна юрри» юрра юрлаттарчĕ. Чылай вăхăт хушши савăнтарчĕç артистсем куракансене. Питех те ăшшăн кĕтсе илчĕç «Эчкерен çăлтăрĕсем» ушкăна Шатракасси тăрăхĕнче пурăнакансем.
Надежда Ершова клуб ерÿçи куракансен ячĕпе артистсене чĕререн тухакан ăшă сăмахсем каласа хавхалантарчĕ артистсене. «Кун пек концерта 500 тенкĕ парса кĕме те шалккă мар», - терĕç залра ларакансем юлашкинчен. Татах та çĕнĕ концертсемпе килсе савăнтарма ыйтрĕ ял хăлăхĕ артистсене.
Юлашкинчен илемлĕ такмак кĕввипе такмакласа ташларĕç артистсем. Ăшă сăмахсем каласа, пĕр-пĕринпе кăмăллă уйăрăлчĕç артистсемпе куракансем.
Территориальный отдел "Москакасинский" Управления по благоустройству и развитию территорий администрации Моргаушского муниципального округа Чувашской Республики