08:02 30 сентября 2019 г.
Вӑхӑт хӑй еккипех шӑвать. Тин кӑна ыхра-сухан кӑлараттӑмӑр, çӗр улми пуçтараттӑмӑр. Акӑ ӗнтӗ авӑн уйӑхӗ те вӗçленсе пырать. Çавна май пысӑк уяв, аслӑ ӑру çыннисен уявӗ çывхарса килет. Ватӑсене хисеплемелли, сума сумалли уяв вӑл.«Ватти пур та латти пур», «Ватӑ çын – тӑватӑ çын», - теççӗ халӑхра. Чӑн та, мӗн тери телей вӑл - асатте-асанне, кукамай-кукаçи пурри! Çирӗп ыйтма та, хавхалантарма та, сӗнӳ-канаш пама та, йӑпатма та пултараççӗ вӗсем.
Авӑн уйӑхӗн 29-мӗшӗнче Вӑрман Енӗш клубӗнче ватӑ çынсене чысларӗç. Ямаш ял тӑрӑхӗн пуçлӑхӗ Аристархова Т.В. уява килнисене ӑшшӑн саламларӗ, ял пурнӑçне хастар хутшӑннӑшӑн тав турӗ, ырлӑх-сывлӑх, вӑрӑм кун-çул сунчӗ.
Ырӑ кӑмӑллӑ асатте-асаннесене, тарават кукаçи-кукамайсемпе ӑш пиллӗ кинемей- мучисене саламлама Шупашкартан «Шуçӑм» фольклор ушкӑнӗ килсе çитрӗ. Илемлӗ юрӑ-ташӑпа тыткӑна илчӗç хӑнасем, чӑваш кӗвви-çеммипе ватӑсен чунне çемçетрӗç, кӑмӑла çӗклерӗç.
Уяв хӗрнӗçемӗн хӗрсе пычӗ. Ял-йыш артистсемпе пӗрле чун килениччен юрласа-ташласа савӑнчӗ.
Хисеплӗ ватӑсем, сирӗн хыçра хӗрӳ ӗçре иртнӗ вун-вун çул. Паян та эсир алӑ усса лармастӑр: кил хушшинче, пахчара тӑрмашатӑр,чӑх-чӗп ӳстеретӗр, выльӑх-чӗрлӗх пӑхатӑр, алсиш-чӑлха çыхатӑр, мӑнуксене çитӗнтерме пулӑшатӑр. Çутӑ кунпа киленсе, ачасемпе савӑнса, мӑнуксемпе хавхаланса пурӑнма çирӗп сывлӑх, вӑй-хӑват, ырӑ кун-çул сунатпӑр сире. Инкек-синкек айккинче çӳретӗр. Савӑнӑçлӑ та канӑçлӑ кунсем ытларах пулччӑр.
Ямашевский территориальный отдел