Новости » Чăваш чĕлхи кунĕ

10:18 25 апреля 2017 г.

Оригинал

Ака уйăхĕн 25-мĕшĕ – чăваш чĕлхи кунĕ. Чăвашсене çутта кăларакан Иван Яковлевич Яковлев çуралнă кун. Чăваш Республикинчи кашни учрежденире çак уява паллă тăваççĕ. Хĕрлĕ Чутайри тĕп библиотекăра та кашни çулах чăваш чĕлхи эрни иртет. Паянхи уява вулавăша Хĕрлĕ Чутайри вăтам шкулта вĕренекенсем килсе çитрĕç. Чăваш чĕлхи çинчен каланă сăвă йĕркисемпе уяв каçне тĕп библиотекарь Елена Чубайкина уçрĕ. Вăл «Чăваш чĕлхи: аваллăхран малашлăха» кĕнекесен куравĕпе паллаштарчĕ. Кĕнеке çÿлĕкĕсем çинче тĕрлĕрен чăваш чĕлхи çинчен кăларнă  кĕнекесемпе, чăваш чĕлхине тĕпчекенсемпе, словарьсемпе паллашма пулать. Çавăн пекех уйрăммăн И.Я.Яковлев пурнăçĕпе ĕçĕ-хĕлне илсе кăтартнă. Ачасем электронлă алфавит çулçÿревĕ витĕр тухрĕç. Тĕрлĕрен ыйтусем çине хуравларĕç. Уяв каçĕ пурне те килĕшрĕ.

Библиотечные учреждения автономного учреждения "Многофункциональный культурный центр" Красночетайского района Чувашской Республики