00:00 28 ноября 2005 г.
Пушар хăрушлăхлĕ сезонне пĕтĕмлетни.
Чăваш Республикинчи вăрман хуçалăх агентстви кăçалхи пушар хăрушлăхлĕ сезонне пĕтĕмлетнĕ. Республикăри вăрмансенче пурĕ 68 хутчен пушар тухнă, вĕсен лаптăкĕ – 13,5 гектарпа танлашать. Виçĕ гектара яхăн çамрăк хыр вăрманĕ сиенленнĕ, ытти лаптăкĕсенче вăрман сарăмĕ (подстилка) çуннă. Пушарсем вăрман хуçалăхне 1164,4 пин тенкĕлĕх сиен кÿнĕ, вĕсенчен 95% - пушарсене сÿнтернĕ чухне ĕçленĕ çынсемпе техникăн, юрăхсăра тухнă обоудованипе çунтрамалли-сĕрмелли материалсен пайĕ. Çак инкекĕн тĕп сăлтавĕ – çынсем пушар правилисене пăхăнманни, хăйсене вăрманта тытма пĕлменни.
Вăрман хуçалăхĕнчи пушар-хими станцинчи командăсем тата вăрман хуралçисем тимлĕхлĕ пулнăран пушарсем пысăк лаптăк çинче алхасман, вĕсене вăхăтра тупса сÿнтерсе пынă. Пĕтĕм сезон тăршĕпех вăрман ĕçченĕсем вăрманта вут-кăвар тухас хăрушлăха сăнаса, йĕркелесе пынă.
Хальхи вăхăтра вырăнсенче çитес çулхи пушар сезонне хатĕрленеççĕ, пушарсемпе кĕрешмелли техникăпа ятарлă оборудованисене юсаççĕ, вăрман лаптăкĕсенче пушара хирĕç кĕрешмелли ĕç калăпăшĕсене палăртаççĕ.