13:33 30 апреля 2021 г.
«Дружба» колхозӗн председателӗнче нумай ҫул ӗҫлесе пысӑк ҫитӗнӳсем тунӑ Сенат Алиуллович Алиуллов ҫуралнӑранпа 100 ҫул ҫитнине халалласа районти «Ҫӗр тата ҫынсем» халӑх музейӗнче «Тавах сана, Сенат пичче!» ятпа курав уҫӑлчӗ.
С.А.Алиуллов Эльпуҫ ялӗнче кун ҫути курнӑ. Каччӑн ҫамрӑклӑхӗ Аслӑ Отечественнӑй вӑрҫӑ вӑхӑтне лекнӗ. Вӑрҫӑн пӗрремӗш кунӗсенчех унӑн фронта кайма ят тухнӑ. Аманнине пула демобилизацилесен Сенат Алиуллович Эльпуҫ ял совечӗн секретарӗнче, шкулта военрукра, инструкторта, Комсомольскинчи ВКП(б) райкомӗн ял хуҫалӑх пайӗн заведующийӗнче тӑрӑшнӑ. 1951 ҫулта ӑна юлса пыракан «Дружба» колхозӑн тилхепине шанса панӑ.
Колхозра ун чухне, чӑнах та, лару-тӑру йывӑр пулнӑ. ҫӗрпе ӗҫлеме йывӑҫ сӳресемпе, лаша сухапуҫӗсемпе ҫеҫ усӑ курнӑ, техника хатӗрӗсем пулман, ҫавна май тухӑҫ та, ӗнесен сӑвӑмӗ те пӗчӗк пулнӑ. Ҫамрӑк председатель хӑйне шанса панӑ хуҫалӑха аталантарас тесе ҫанӑ тавӑрса ӗҫе пикеннӗ. Тӑрӑшулӑха, пуҫарулӑха, халӑхпа пӗр чӗлхе тупма пӗлнине кура колхоза майӗпен ура ҫине тӑратма май килнӗ. «Дружба» районти чи ӑнӑҫлӑ хуҫалӑхсен шутне те кӗнӗ, ӑмӑртусенче мала тухса хаклӑ парнесене тивӗҫнӗ.
Сенат Алиулловича Ӗҫлӗх Хӗрлӗ Ялав (1966), Октябрь Революцийӗн (1971), Ленин (1973, 1976), Аслӑ Отечественнӑй вӑрҫӑ орденӗсемпе, Чӑваш АССРӗн Аслӑ Канашӗн Президиумӗн Хисеп грамотисемпе (1950, 1960, 1971, 1981), РСФСР Аслӑ Канашӗн Президиумӗн Хисеп грамотипе (1960), медальсемпе наградӑланӑ, Комсомольски районӗн Хисеп кӗнекине кӗртнӗ.
Чӑваш АССРӗн ял хуҫалӑх тава тивӗҫлӗ ӗҫченӗ ячӗпе хатӗрленӗ курава уҫма музее район пуҫлӑхӗ Ремис Мансуров, район администрацийӗн пуҫлӑхӗ Александр Осипов, Элпуҫ ял тӑрӑхӗн пуҫлӑхӗ Расим Асеинов, культура ӗҫченӗсем, С.А.Алиулловпа пӗрле ӗҫленисем, унӑн тӑванӗсем тата ыттисем те пуҫтарӑнчӗҫ. Вӗсем Сенат Алиулловича аса илсе чылай ӑшӑ сӑмахсем каларӗҫ, вӑл тунӑ ӗҫсем халӑх асӗнче упраннине палӑртрӗҫ.
Курав июнӗн 1-мӗшӗчен ӗҫлет. Ун хыҫҫӑн вара экспонатсене «Дружба» ЯХПКна параҫҫӗ.
Муниципальное бюджетное учреждение культуры "Централизованная библиотечная система" Комсомольского района Чувашской Республики